حج عازمین کے لیے دوسری قسط کی وصولی شروع، 20 اکتوبر آخری تاریخ مقرر
سرکاری حج اسکیم کے تحت حج کے لیے منتخب عازمین سے دوسری قسط کی وصولی کا عمل آج سے شروع ہوگیا ہے، جبکہ وزارت مذہبی امور نے ادائیگی کے لیے 20 اکتوبر کو آخری تاریخ مقرر کردی ہے۔
وزارت مذہبی امور کے ترجمان کے مطابق سرکاری اسکیم کے تحت حج کے لیے منتخب عازمین اپنی دوسری قسط 5 اکتوبر سے 20 اکتوبر تک جمع کراسکیں گے۔ عازمین کو ہدایت کی گئی ہے کہ وہ مقررہ مدت کے اندر اپنی ادائیگی مکمل کریں تاکہ حج کے آئندہ مراحل میں کسی قسم کی دشواری کا سامنا نہ کرنا پڑے۔
ترجمان نے واضح کیا ہے کہ دوسری قسط جمع کرانے سے قبل میڈیکل فٹنس سرٹیفکیٹ اپ لوڈ کرنا لازمی ہوگا۔ عازمین کو پہلے اپنی طبی فٹنس کا سرٹیفکیٹ مقررہ نظام پر اپ لوڈ کرنا ہوگا، جس کے بعد ہی دوسری قسط کی ادائیگی کا عمل مکمل کیا جاسکے گا۔
وزارت مذہبی امور نے عازمین پر زور دیا ہے کہ وہ مقررہ تاریخ کا خیال رکھتے ہوئے تمام ضروری مراحل بروقت مکمل کریں۔ مقررہ مدت کے دوران قسط جمع نہ کرانے کی صورت میں عازمین کو حج سے متعلق آئندہ مراحل میں مشکلات پیش آسکتی ہیں۔
حکام کے مطابق حج سے متعلق دیگر انتظامات اور ضروری مراحل بھی مقررہ شیڈول کے مطابق جاری رہیں گے۔
