“دا گز اور دا میدان، ہم بھی کسی سے کم نہیں، ہمارے بچے انہیں سبق سکھائیں گے”، ڈی جی آئی ایس پی آر
راولپنڈی: پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے دہشت گردی کے خلاف جاری جنگ کے حوالے سے پشتو زبان کا ایک معروف محاورہ استعمال کرتے ہوئے کہا کہ “دا گز اور دا میدان، ہم بھی کسی سے کم نہیں، ہمارے بچے انہیں سبق سکھائیں گے۔”
سیکیورٹی امور پر میڈیا بریفنگ کے دوران ڈی جی آئی ایس پی آر نے اس عزم کا اظہار کیا کہ پاکستان دہشت گردی کے خلاف اپنی جنگ پوری قوت کے ساتھ جاری رکھے گا اور ملک دشمن عناصر کے مذموم عزائم کو ہر صورت ناکام بنایا جائے گا۔
انہوں نے کہا کہ سیکیورٹی فورسز، قانون نافذ کرنے والے ادارے اور عوام دہشت گردی کے خلاف متحد ہیں اور پاکستان کے نوجوان ملک کے دفاع اور امن کے قیام کے لیے ہر محاذ پر اپنا کردار ادا کرتے رہیں گے۔
لیفٹیننٹ جنرل احمد شریف چوہدری نے واضح کیا کہ پاکستان کی مسلح افواج کسی بھی خطرے سے نمٹنے کی مکمل صلاحیت رکھتی ہیں اور دہشت گردوں کے خلاف کارروائیاں بلاامتیاز جاری رہیں گی۔
ڈی جی آئی ایس پی آر کے پشتو محاورے اور پُرعزم بیان کو سوشل میڈیا پر بھی غیر معمولی پذیرائی حاصل ہوئی، جہاں صارفین نے اسے قومی جذبے اور عزم کی علامت قرار دیا۔
