راول ایکسپریس کو جہلم کے قریب حادثہ، انجن اور 3 بوگیاں متاثر
جہلم: راول ایکسپریس کو جہلم کے قریب کالا گجراں اسٹیشن پر بریک فیل ہونے کے باعث حادثہ پیش آیا، تاہم خوش قسمتی سے ٹرین میں سوار مسافر محفوظ رہے۔
ریلوے ذرائع کے مطابق راول ایکسپریس رات ساڑھے 12 بجے راولپنڈی سے لاہور کے لیے روانہ ہوئی تھی۔ ٹرین جب جہلم کے قریب کالا گجراں اسٹیشن پہنچی تو بریک فیل ہونے کے باعث حادثے کا شکار ہوگئی۔
ریلوے حکام کے مطابق حادثے میں ٹرین کا انجن اور 3 بوگیاں متاثر ہوئی ہیں، تاہم مسافروں میں سے کسی کے زخمی یا جاں بحق ہونے کی اطلاع نہیں ملی۔
حادثے کے بعد متعلقہ ریلوے عملے نے موقع پر صورتحال کا جائزہ لینا شروع کردیا، جبکہ متاثرہ ٹرین کی بحالی اور ریلوے ٹریک کو معمول کے مطابق کھولنے کے لیے اقدامات جاری ہیں۔
حادثے کے باعث راولپنڈی اور لاہور کے درمیان ٹرین سروس کا معمول کا شیڈول متاثر ہونے کا امکان ہے۔ ریلوے حکام کی جانب سے واقعے کی مزید تفصیلات اور ٹرین آپریشن کی بحالی کے حوالے سے تاحال کوئی حتمی معلومات جاری نہیں کی گئیں۔
حکام کے مطابق متاثرہ ٹرین اور ٹریک کی بحالی کا کام مکمل ہونے کے بعد سروس کو معمول کے مطابق چلانے کی کوشش کی جا رہی ہے۔
