سام سنگ کی 2 اے آر ایپس بند کرنے کا فیصلہ، 31 دسمبر کے بعد ڈاؤن لوڈ ممکن نہیں ہوگا
اسلام آباد: ٹیکنالوجی کمپنی سام سنگ نے اپنی دو آگمنٹڈ ریئلٹی (اے آر) ایپس اے آر ڈوڈل اور کوئک میژر کو بند کرنے کا فیصلہ کرلیا ہے، جس کے بعد صارفین 31 دسمبر 2026 کے بعد انہیں گلیکسی ایپ اسٹور سے ڈاؤن لوڈ نہیں کرسکیں گے۔
سام سنگ نے دونوں ایپس کی بندش سے متعلق معلومات گلیکسی ایپ اسٹور پر موجود ان کے چینج لاگز میں بھی شامل کردی ہیں۔ کمپنی کے مطابق کچھ نئی گلیکسی ڈیوائسز پر یہ ایپس پہلے ہی دستیاب نہیں ہیں، جن میں گلیکسی زیڈ فولڈ 8 بھی شامل ہے۔
اے آر ڈوڈل کیا تھی؟
اے آر ڈوڈل سام سنگ صارفین کو فون کے کیمرے کے ذریعے حقیقی دنیا کے مناظر پر ورچوئل ڈرائنگ بنانے کی سہولت فراہم کرتی تھی۔ صارفین کمرے، دیوار یا اپنے اردگرد موجود دیگر اشیا کو دیکھتے ہوئے اسکرین پر ڈرائنگ کرسکتے تھے۔
اس ایپ کی خاص بات یہ تھی کہ بنائی گئی ورچوئل ڈرائنگ حقیقی دنیا میں موجود اشیا، چہرے یا کمرے کے مختلف حصوں کے ساتھ منسلک رہ سکتی تھی۔ اسٹائلس سپورٹ رکھنے والے گلیکسی فونز میں صارفین اسٹائلس کے ذریعے بھی ڈرائنگ بنانے سے فائدہ اٹھا سکتے تھے۔
کوئک میژر سے پیمائش کی سہولت
سام سنگ کی دوسری اے آر ایپ کوئک میژر فون کے کیمرے کو ایک بنیادی پیمائشی آلے میں تبدیل کردیتی تھی۔ صارفین اس کے ذریعے بڑی اشیا، دیواروں اور مختلف جگہوں کے اندازاً سائز معلوم کرنے کے علاوہ دو اشیا کے درمیان فاصلے کی پیمائش بھی کرسکتے تھے۔
اگرچہ یہ پیمائشیں پیشہ ورانہ آلات کا متبادل نہیں تھیں، تاہم روزمرہ کے مختلف کاموں میں یہ فیچر صارفین کے لیے خاصا کارآمد ثابت ہوتا تھا۔
موجودہ صارفین پر کیا اثر پڑے گا؟
سام سنگ کے مطابق 31 دسمبر 2026 کے بعد دونوں ایپس نئی ڈیوائسز پر دستیاب نہیں ہوں گی اور مستقبل کے آپریٹنگ سسٹمز میں بھی ان کی سپورٹ ختم کردی جائے گی۔
تاہم جن صارفین کے فونز میں یہ ایپس پہلے سے انسٹال ہیں، وہ ممکنہ طور پر انہیں اس وقت تک استعمال کرسکیں گے جب تک ان کے متعلقہ ڈیوائس کا سافٹ ویئر ان ایپس کو سپورٹ کرتا رہے۔
یوں سام سنگ کی یہ دونوں اے آر ایپس، جو کیمرے کے ذریعے حقیقی دنیا میں ورچوئل ڈرائنگ اور اشیا کی پیمائش جیسی سہولیات فراہم کرتی تھیں، مرحلہ وار صارفین سے رخصت ہونے جارہی ہیں۔
