سوات میں باراتیوں کی گاڑی حادثے کا شکار، ایک شخص جاں بحق، 15 زخمی
سوات: خیبرپختونخوا کے ضلع سوات میں شادی کی تقریب سے واپس آنے والی باراتیوں سے بھری سوزوکی پک اپ حادثے کا شکار ہوگئی، جس کے نتیجے میں ایک شخص جاں بحق جبکہ 15 افراد زخمی ہوگئے۔
حادثہ ارکوٹ کے مقام پر پیش آیا جہاں باراتیوں کو لے جانے والی سوزوکی پک اپ ایک موٹر کار سے ٹکرا گئی۔ ابتدائی اطلاعات کے مطابق حادثے کی وجہ تیز رفتاری بتائی جارہی ہے۔
موٹر کار سے تصادم کے بعد سوزوکی پک اپ بے قابو ہوگئی اور سڑک سے اتر کر قریبی کھائی میں جاگری۔ حادثے کے باعث گاڑی میں سوار افراد کو شدید چوٹیں آئیں۔
حادثے کی اطلاع ملتے ہی مقامی افراد بڑی تعداد میں جائے حادثہ پر پہنچ گئے اور امدادی کارروائیوں میں حصہ لیا۔ ریسکیو 1122 کی ٹیمیں بھی فوری طور پر موقع پر پہنچ گئیں اور زخمیوں کو گاڑی سے نکال کر ابتدائی طبی امداد فراہم کی۔
ریسکیو اہلکاروں کے مطابق زخمیوں کو مزید علاج کے لیے سول ہسپتال مٹہ منتقل کردیا گیا، جہاں انہیں طبی امداد دی جارہی ہے۔ حادثے میں جاں بحق ہونے والے شخص کی شناخت اور زخمیوں کی حالت سے متعلق مزید معلومات سامنے نہیں آسکیں۔
واقعے کے بعد متعلقہ اداروں نے حادثے کی وجوہات سے متعلق مزید کارروائی شروع کردی ہے۔
