صنعتی اور زرعی صارفین کیلئے اضافی بجلی کھپت پر ریلیف کم کرنے کا فیصلہ

اسلام آباد: نیشنل الیکٹرک پاور ریگولیٹری اتھارٹی (نیپرا) نے صنعتی اور زرعی صارفین کے لیے بجلی کی اضافی کھپت پر دیے جانے والے ریلیف میں کمی کا فیصلہ کر لیا ہے۔ نیپرا نے اضافی بجلی کھپت کا رعایتی نرخ 2 روپے 32 پیسے فی یونٹ اضافے کے ساتھ 22 روپے 98 پیسے سے بڑھا کر 25 روپے 30 پیسے مقرر کرنے کی منظوری دے دی ہے۔

نیپرا نے اپنا فیصلہ وفاقی حکومت کو بھجوا دیا ہے، جس کے مطابق صنعتی اور زرعی صارفین کو اضافی بجلی استعمال کرنے پر ملنے والا ریلیف کم ہو جائے گا۔ فیصلے کے تحت نیا نرخ نومبر 2026 کے بلنگ مہینے سے نافذ العمل ہوگا۔

وفاقی حکومت اس وقت صنعتی اور زرعی صارفین کو بجلی کی اضافی کھپت پر فی یونٹ 11 سے 15 روپے تک ریلیف فراہم کر رہی ہے۔ یہ سہولت گزشتہ سال کے اسی مہینے کے مقابلے میں زیادہ بجلی استعمال کرنے پر دی جاتی ہے، یعنی رعایتی نرخ کا اطلاق صرف اضافی کھپت پر ہوتا ہے۔

وفاقی حکومت نے زرعی اور صنعتی شعبوں کے لیے تین سالہ ریلیف پیکج کا اعلان کیا تھا، جس کے تحت زرعی صارفین کے لیے 38 روپے اور صنعتی صارفین کے لیے 34 روپے فی یونٹ کے بجائے اضافی بجلی کی کھپت پر 22 روپے 98 پیسے فی یونٹ نرخ مقرر کیا گیا تھا۔ اب نیپرا نے اس رعایتی نرخ کو بڑھا کر 25 روپے 30 پیسے فی یونٹ کرنے کی منظوری دی ہے۔

نیپرا کا یہ فیصلہ چیئرمین نیپرا کے کاسٹنگ ووٹ کے ذریعے کیا گیا، جبکہ دو ارکان نے اس سے اختلاف کرتے ہوئے اختلافی نوٹ بھی تحریر کیے۔ اختلاف کرنے والے ارکان میں آمنہ احمد اور مقصود انور خان شامل ہیں۔ اختلافی نوٹ میں 25 روپے 30 پیسے فی یونٹ کے تعین کو بے بنیاد قرار دیا گیا۔

دوسری جانب ترجمان پاور ڈویژن نے واضح کیا ہے کہ صنعتی اور زرعی صارفین کے بنیادی بجلی ٹیرف میں کوئی تبدیلی نہیں کی گئی۔ ان کے مطابق صرف ان شعبوں میں اضافی بجلی کی کھپت پر فی یونٹ 2 روپے 32 پیسے تک اضافے کی تجویز ہے۔