عیدالاضحیٰ پر 10 ہزار روپے اعزازیے کی عدم ادائیگی، سینٹری ورکرز کا پنجاب حکومت کے خلاف احتجاج
پنجاب کی وزیراعلیٰ مریم نواز کی جانب سے عیدالاضحیٰ کے موقع پر سینٹری ورکرز کو 10 ہزار روپے اعزازیہ دینے کے اعلان پر عملدرآمد نہ ہونے کے خلاف راولپنڈی میں ملازمین نے احتجاجی مظاہرہ کیا۔ مظاہرین کا کہنا ہے کہ عید کو کئی ماہ گزر چکے ہیں، لیکن متعدد ملازمین اب بھی اعلان کردہ اعزازیے سے محروم ہیں۔
راولپنڈی پریس کلب کے باہر ہونے والے احتجاج میں راولپنڈی ویسٹ مینجمنٹ کمپنی (RWMC)، واسا اور میونسپل کارپوریشن کے ملازمین نے بڑی تعداد میں شرکت کی۔ خواتین ملازمین بھی احتجاج میں شریک ہوئیں اور حکومت کے خلاف نعرے بازی کرتے ہوئے مطالبہ کیا کہ وزیراعلیٰ پنجاب اپنا وعدہ پورا کریں۔
مظاہرین کا کہنا تھا کہ عیدالاضحیٰ کے دوران انہوں نے صفائی کے خصوصی آپریشن میں دن رات خدمات انجام دیں اور شہریوں کو صاف ستھرا ماحول فراہم کرنے کے لیے بھرپور محنت کی۔ حکومت نے ان خدمات کے اعتراف میں فی ملازم 10 ہزار روپے اعزازیہ دینے کا اعلان کیا تھا، تاہم اب تک سیکڑوں ملازمین کو یہ رقم ادا نہیں کی گئی۔
احتجاج میں شریک ملازمین نے یہ بھی الزام عائد کیا کہ حکومت نے نہ صرف اعزازیے کی ادائیگی میں تاخیر کی بلکہ ملازمین کو مستقل کرنے سے متعلق وعدے بھی پورے نہیں کیے۔ ان کا کہنا تھا کہ بارہا متعلقہ حکام سے رابطہ کرنے کے باوجود انہیں صرف یقین دہانیاں کرائی گئیں، عملی اقدامات نہیں کیے گئے۔
مظاہرین نے وزیراعلیٰ پنجاب سے مطالبہ کیا کہ تمام مستحق سینٹری ورکرز کو فوری طور پر 10 ہزار روپے اعزازیہ ادا کیا جائے اور ملازمین کو مستقل کرنے سمیت دیگر وعدوں پر بھی عملدرآمد کیا جائے۔ انہوں نے خبردار کیا کہ اگر مطالبات تسلیم نہ کیے گئے تو احتجاج کا دائرہ مزید وسیع کیا جائے گا۔
دوسری جانب اس معاملے پر پنجاب حکومت یا متعلقہ اداروں کی جانب سے احتجاج کے حوالے سے فوری طور پر کوئی باضابطہ مؤقف سامنے نہیں آیا۔ ملازمین کا کہنا ہے کہ وہ اپنے مطالبات کی منظوری تک پرامن احتجاج جاری رکھیں گے۔
