فضل الرحمٰن سے اختلاف احترام کے ساتھ ہوگا، توتکار برداشت نہیں، رانا ثناء اللہ کی تنبیہ
اسلام آباد: وزیراعظم کے مشیر برائے سیاسی امور سینیٹر رانا ثناء اللہ نے جمعیت علمائے اسلام (ف) کے سربراہ مولانا فضل الرحمٰن کو سیاسی اختلافات کے دوران احترام اور شائستگی برقرار رکھنے کی ہدایت کرتے ہوئے کہا ہے کہ حکومت اختلاف رائے کا احترام کرتی ہے، تاہم توتکار اور غیر ضروری تلخ بیانی برداشت نہیں کی جائے گی۔
رانا ثناء اللہ نے مولانا فضل الرحمٰن کی حالیہ بیان بازی اور سیکیورٹی کیبن کے معاملے پر ردعمل دیتے ہوئے کہا کہ اس وقت ملک کو دہشت گردی کی سنگین صورتحال کا سامنا ہے اور قومی سطح پر توجہ اس بڑے مسئلے پر ہونی چاہیے۔ ان کے مطابق مولانا فضل الرحمٰن کے گھر کے باہر جنریٹر یا سیکیورٹی کیبن کا معاملہ ملک کا سب سے بڑا مسئلہ نہیں ہے۔
انہوں نے مولانا فضل الرحمٰن کو مشورہ دیا کہ وہ اپنے جذبات اور غصے پر قابو رکھیں اور سیاسی گفتگو میں احترام کا دامن ہاتھ سے نہ چھوڑیں۔ رانا ثناء اللہ کا کہنا تھا کہ حکومت اور اتحادی جماعتیں ماضی میں 26ویں آئینی ترمیم کی منظوری کے لیے تقریباً ڈیڑھ ماہ تک مولانا فضل الرحمٰن سے رابطے میں رہیں اور ان کے تحفظات دور کرنے کی کوشش کرتی رہیں۔
وزیراعظم کے مشیر نے واضح کیا کہ سیاسی اختلافات جمہوری نظام کا حصہ ہیں، تاہم ان اختلافات کو ذاتی تلخی اور غیر ضروری محاذ آرائی میں تبدیل نہیں ہونا چاہیے۔ انہوں نے کہا کہ سیاسی معاملات کو افہام و تفہیم اور باہمی احترام کے ذریعے حل کیا جانا چاہیے۔
نئے صوبوں کے قیام، ریفرنڈم اور آئینی ترامیم سے متعلق قیاس آرائیوں پر بات کرتے ہوئے رانا ثناء اللہ نے کہا کہ ایسے اہم قومی فیصلوں کا اختیار صرف پارلیمنٹ کے پاس ہے۔ ان کے مطابق آئینی معاملات پر حتمی فیصلہ پارلیمانی فورم پر ہی ہونا چاہیے۔
انہوں نے 18ویں آئینی ترمیم کا حوالہ دیتے ہوئے کہا کہ صوبائی اختیارات کو نچلی سطح تک منتقل نہ کرنا ایک بڑا مسئلہ ہے۔ ان کا کہنا تھا کہ بلدیاتی اداروں کو آئینی تحفظ اور براہ راست فنڈز کی فراہمی ضروری ہے تاکہ عوامی مسائل مقامی سطح پر حل ہوسکیں اور اختیارات کی حقیقی منتقلی ممکن بنائی جاسکے۔
دوسری جانب بانی پاکستان تحریک انصاف عمران خان کی صحت سے متعلق گردش کرنے والی خبروں پر ردعمل دیتے ہوئے رانا ثناء اللہ نے کہا کہ عمران خان کا بلڈ پریشر بالکل نارمل ہے۔ انہوں نے دعویٰ کیا کہ اگر پی ٹی آئی رہنما جیل ملاقاتوں کو سیاسی مقاصد کے لیے استعمال کرنا اور غلط معلومات پھیلانا بند کردیں تو ملاقاتیں فوری طور پر بحال کی جاسکتی ہیں۔
انہوں نے زور دیا کہ موجودہ حالات میں سیاسی قیادت کو باہمی احترام کے ساتھ قومی مسائل کے حل پر توجہ دینی چاہیے۔
