فیلڈ مارشل سید عاصم منیر اور صومالیہ کے وزیر دفاع کی ملاقات، دفاعی تعاون مزید مضبوط بنانے پر اتفاق
راولپنڈی: پاکستان اور صومالیہ نے دفاعی تعلقات کو مزید وسعت دینے، فوجی تربیت، استعدادِ کار میں اضافے اور مشترکہ سیکیورٹی چیلنجز سے نمٹنے کے لیے باہمی تعاون کو مضبوط بنانے کے عزم کا اعادہ کیا ہے۔
پاک فوج کے شعبہ تعلقات عامہ (آئی ایس پی آر) کے مطابق صومالیہ کے وزیر دفاع کی قیادت میں اعلیٰ سطحی دفاعی وفد نے جنرل ہیڈ کوارٹرز (جی ایچ کیو) راولپنڈی کا دورہ کیا، جہاں وفد نے فیلڈ مارشل سید عاصم منیر سے ملاقات کی۔ ملاقات میں دونوں ممالک کے درمیان دفاعی تعاون، علاقائی سلامتی کی صورتحال، فوجی روابط اور پیشہ ورانہ اشتراک کو فروغ دینے سمیت باہمی دلچسپی کے متعدد امور پر تفصیلی تبادلہ خیال کیا گیا۔
آئی ایس پی آر کے مطابق دونوں رہنماؤں نے اس بات پر اتفاق کیا کہ پاکستان اور صومالیہ کے درمیان دفاعی شراکت داری کو مزید مستحکم کیا جائے گا۔ اس مقصد کے لیے فوجی تربیتی پروگراموں، پیشہ ورانہ تبادلوں، استعدادِ کار بڑھانے اور دفاعی اداروں کے درمیان تعاون کو مزید فروغ دیا جائے گا۔
ملاقات کے دوران دونوں فریقوں نے دہشت گردی، انتہا پسندی اور خطے کو درپیش دیگر مشترکہ سیکیورٹی خطرات سے مؤثر انداز میں نمٹنے کے لیے قریبی تعاون جاری رکھنے کے عزم کا اظہار بھی کیا۔ اس موقع پر زور دیا گیا کہ دفاعی تعاون نہ صرف دونوں ممالک کی سلامتی بلکہ خطے میں امن اور استحکام کے فروغ میں بھی اہم کردار ادا کرے گا۔
صومالیہ کے وزیر دفاع نے علاقائی امن و استحکام کے لیے پاکستان کی مستقل حمایت اور مسلح افواج کی پیشہ ورانہ صلاحیتوں کو سراہتے ہوئے کہا کہ پاکستان نے انسدادِ دہشت گردی، امن کے قیام اور دفاعی شعبے میں قابلِ قدر خدمات انجام دی ہیں، جنہیں عالمی سطح پر قدر کی نگاہ سے دیکھا جاتا ہے۔ انہوں نے پاکستان کے ساتھ دفاعی تعلقات کو مزید وسعت دینے میں گہری دلچسپی کا اظہار بھی کیا۔
اس موقع پر فیلڈ مارشل سید عاصم منیر نے صومالیہ کی دفاعی اور سیکیورٹی صلاحیتوں کو مضبوط بنانے کے لیے پاکستان کے مکمل تعاون کا اعادہ کرتے ہوئے کہا کہ پاکستان دوست ممالک کے ساتھ مضبوط دفاعی شراکت داری، امن، استحکام اور باہمی تعاون کے فروغ پر یقین رکھتا ہے۔
آئی ایس پی آر کے مطابق ملاقات خوشگوار ماحول میں ہوئی، جس میں اس اعتماد کا اظہار کیا گیا کہ مشترکہ تربیتی پروگراموں، فوجی روابط اور دفاعی تعاون میں اضافے سے پاکستان اور صومالیہ کے تعلقات مزید مستحکم ہوں گے اور یہ تعاون دونوں ممالک سمیت پورے خطے میں پائیدار امن و استحکام کے فروغ میں معاون ثابت ہوگا۔
