وزیراعظم اپنا گھر پروگرام: 104 ارب روپے کے ہاؤسنگ قرضے جاری

وزیراعظم اپنا گھر پروگرام کے تحت اب تک 17 ہزار 697 افراد کو 104 ارب روپے کے ہاؤسنگ قرضے جاری کر دیے گئے ہیں، جبکہ 90 ہزار 405 درخواستوں پر مجموعی طور پر 533 ارب روپے کے قرضوں کی منظوری دی جا چکی ہے۔

وزارت خزانہ کے مطابق 30 اکتوبر 2026 تک پروگرام کے تحت مجموعی طور پر 2 لاکھ 20 ہزار 715 درخواستیں موصول ہوئیں، جن میں سے 41 فیصد یعنی 90 ہزار 405 درخواستیں منظور کی گئیں۔ وزارت کے جاری کردہ اعدادوشمار کے مطابق جون 2026 سے اکتوبر کے اختتام تک قرضوں کی فراہمی میں 404 فیصد اضافہ ریکارڈ کیا گیا۔

اعدادوشمار کے مطابق جون 2026 میں 21 ارب روپے کے ہاؤسنگ قرضے جاری کیے گئے تھے، جن کا حجم اکتوبر کے اختتام تک بڑھ کر 104 ارب روپے تک پہنچ گیا۔ اسی عرصے کے دوران قرضوں کی منظوری میں بھی 269 فیصد اضافہ ریکارڈ کیا گیا۔

وزارت خزانہ کا کہنا ہے کہ وزیراعظم اپنا گھر پروگرام کا بنیادی مقصد کم آمدن والے افراد اور خاندانوں کو آسان شرائط پر گھر کی تعمیر یا خریداری کے لیے مالی معاونت فراہم کرنا ہے، تاکہ وہ اپنی ذاتی رہائش کا خواب پورا کر سکیں۔

وزارت کے مطابق پروگرام کے ذریعے ہزاروں خاندانوں کو گھر کی ملکیت حاصل کرنے میں مدد ملے گی۔ قرضوں کی فراہمی اور درخواستوں کی منظوری میں ہونے والا اضافہ پروگرام کے تحت مالی معاونت کے دائرہ کار میں وسعت کو ظاہر کرتا ہے۔