پاکستانی دفتر خارجہ کے نئے ترجمان سجاد حیدر خان کون ہیں؟
پاکستانی دفتر خارجہ کے نئے ترجمان سفیر سجاد حیدر خان نے اپنے عہدے کا چارج سنبھال لیا ہے اور 10 ستمبر کو اپنی پہلی نیوز بریفنگ کے دوران ملکی اور عالمی امور پر پاکستان کا مؤقف میڈیا کے سامنے پیش کیا۔
وزارت خارجہ کی ویب سائٹ کے مطابق سجاد حیدر خان نے 2 ستمبر 2026 کو ترجمان دفتر خارجہ کی ذمہ داریاں سنبھالیں۔ وہ اس کے ساتھ ڈائریکٹر جنرل جنوبی ایشیا و سارک کے فرائض بھی انجام دے رہے ہیں۔
سجاد حیدر خان نے فروری 2000 میں پاکستان فارن سروس میں شمولیت اختیار کی۔ انہوں نے پنجاب یونیورسٹی لاہور سے سیاسیات میں ماسٹرز کی ڈگری حاصل کی جبکہ نیشنل ڈیفنس یونیورسٹی اسلام آباد سے بھی تعلیم حاصل کی۔
اپنے طویل سفارتی کیریئر کے دوران سجاد حیدر خان نے وزارت خارجہ میں مختلف اہم عہدوں پر خدمات انجام دی ہیں۔ ان ذمہ داریوں میں ڈائریکٹر افریقہ، ڈائریکٹر امریکا، ڈائریکٹر آرگنائزیشن اینڈ کیریئر پلاننگ، ڈائریکٹر فارن سروس اکیڈمی، ڈائریکٹر جنرل پارلیمانی امور اور ڈائریکٹر جنرل جنوبی ایشیا و سارک شامل ہیں۔
ان کا سفارتی تجربہ بیرون ملک بھی وسیع رہا ہے۔ سجاد حیدر خان نے شام، ہنگری، جرمنی اور انڈونیشیا میں پاکستان کی سفارتی ذمہ داریاں انجام دیں۔ وہ اکتوبر 2020 سے دسمبر 2024 تک بیلاروس میں پاکستان کے سفیر بھی تعینات رہے۔
سجاد حیدر خان نے پاکستان اور بیرون ملک مختلف پیشہ ورانہ اور سفارتی تربیتی پروگرامز میں بھی شرکت کی، جن میں سعودی عرب، ملائیشیا، امریکا، جرمنی اور انڈونیشیا کے پروگرام شامل ہیں۔
لسانی اعتبار سے بھی انہیں وسیع تجربہ حاصل ہے۔ وہ اردو، انگریزی، عربی اور بلتی زبانیں بولتے ہیں، جبکہ جرمن، بہاسا انڈونیشیا اور روسی زبانوں کا بنیادی علم رکھتے ہیں۔
سجاد حیدر خان کا تعلق گلگت بلتستان سے ہے۔ ان کا آبائی گاؤں کواردو ہے، جو سکردو میں واقع ہے۔ طویل سفارتی تجربے، مختلف اہم عہدوں پر خدمات اور متعدد ممالک میں تعیناتی کے بعد اب انہیں پاکستان کی خارجہ پالیسی اور عالمی امور پر سرکاری مؤقف میڈیا تک پہنچانے کی اہم ذمہ داری سونپی گئی ہے۔
