28ویں آئینی ترمیم میں ووٹر کی عمر بڑھانے کی تجویز زیر غور، رانا ثناء اللہ
وفاقی وزیر برائے سیاسی امور رانا ثناء اللہ نے کہا ہے کہ پاکستان میں ممکنہ 28ویں آئینی ترمیم کے تحت ووٹر کی عمر بڑھانے کی تجویز پر غور کیا جا رہا ہے۔
جیو نیوز کے پروگرام ’جرگہ‘ میں گفتگو کرتے ہوئے رانا ثناء اللہ نے کہا کہ اب تک 27 آئینی ترامیم ہو چکی ہیں، اس لیے آئندہ آنے والی کسی بھی ترمیم کو 28ویں آئینی ترمیم ہی کہا جائے گا۔ انہوں نے واضح کیا کہ زیر غور ترامیم بنیادی نوعیت کے قومی معاملات سے متعلق ہوں گی اور اس میں افواجِ پاکستان سے متعلق کوئی شق شامل نہیں ہے۔
انہوں نے بتایا کہ این ایف سی، آبادی، پانی کی تقسیم اور دیگر انتظامی و آئینی معاملات پر مختلف سطحوں پر گفتگو جاری ہے۔ ان کا کہنا تھا کہ بعض معاملات پر اگر سیاسی اتفاقِ رائے قائم ہو جائے تو ان پر عملدرآمد کے لیے آئینی ترمیم ضروری ہو سکتی ہے۔
رانا ثناء اللہ نے مزید کہا کہ ووٹر کی عمر بڑھانے کی تجویز بھی زیر غور ہے۔ ان کے مطابق اگر الیکشن لڑنے کے لیے کم از کم عمر 25 سال مقرر ہے تو ووٹ ڈالنے کو بھی ایک اہم ذمہ داری سمجھتے ہوئے اس کے لیے زیادہ پختگی ہونی چاہیے۔
سیاسی صورتحال پر بات کرتے ہوئے انہوں نے کہا کہ پاکستان پیپلز پارٹی حکومت سے ناراض نہیں ہے اور بلاول بھٹو زرداری نے درست کہا ہے کہ پیپلز پارٹی کی حمایت کے بغیر کوئی آئینی ترمیم منظور نہیں ہو سکتی۔
رانا ثناء اللہ کے اس بیان کے بعد ملک میں انتخابی اصلاحات اور جمہوری عمل سے متعلق نئی سیاسی بحث شروع ہوگئی ہے۔
