ٹرمپ کا ایران پر آج حملہ نہ کرنے کا اعلان، معاہدے کا امکان برقرار
امریکی صدر ڈونلڈ ٹرمپ نے اعلان کیا ہے کہ امریکا آج ایران پر حملہ نہیں کرے گا، تاہم تہران کے ساتھ کسی بڑے معاہدے تک پہنچنے کا امکان اب بھی موجود ہے۔ ان کا کہنا ہے کہ ایران سے متعلق حتمی فیصلہ جلد کرنا ہوگا۔
ڈونلڈ ٹرمپ نے اپنے بیان میں کہا کہ انہیں فیصلہ کرنا ہے کہ ایران کے ساتھ معاہدہ کیا جائے یا معاملے کو ختم کیا جائے۔ ان کے مطابق ایران سے متعلق دو مختلف خفیہ رپورٹس موصول ہوئی ہیں، جن میں ایک دوسرے سے مختلف معلومات فراہم کی گئی ہیں۔ ان رپورٹس کی بنیاد پر ایران کے حوالے سے آئندہ حکمت عملی طے کرنا ہوگی۔
اس سے قبل امریکی صدر نے ایران پر ممکنہ فوجی حملے کا عندیہ دیا تھا اور کہا تھا کہ کارروائی اگلے ہی روز بھی ہوسکتی ہے۔ تاہم انہوں نے اس امکان کو بھی مسترد نہیں کیا کہ امریکا اور ایران کے درمیان کسی بڑے معاہدے پر اتفاق ہوسکتا ہے۔
ٹرمپ نے ممکنہ فوجی کارروائی کے وقت سے متعلق تفصیلات بتانے سے گریز کرتے ہوئے دعویٰ کیا کہ امریکا نے اب تک ایران کے معاملے کو اچھے طریقے سے سنبھالا ہے۔ ان کا کہنا تھا کہ انہیں یقین نہیں کہ ایران معاہدے پر آمادہ ہوگا یا نہیں، تاہم ان کے بقول دونوں صورتوں میں امریکا کامیاب رہے گا۔
امریکی صدر کے تازہ بیان سے ظاہر ہوتا ہے کہ ایران کے معاملے پر سفارتی معاہدے اور فوجی کارروائی، دونوں امکانات زیر غور ہیں۔ تاہم ایران کے ساتھ کسی حتمی معاہدے یا آئندہ لائحہ عمل سے متعلق ابھی کوئی حتمی اعلان سامنے نہیں آیا۔
