رزمک بازار میں تجاوزات کے خلاف آپریشن جاری، مدرسہ مدینۃ العلوم کے قریب دکانیں ہٹانے کا عمل شروع

سرکاری اراضی کو ناجائز قبضوں سے واگزار کرانے کے لیے انتظامیہ متحرک، عوامی راستوں کی بحالی تک کارروائیاں جاری رکھنے کا اعلان۔

رزمک: شمالی وزیرستان کے علاقے رزمک بازار میں سرکاری اراضی پر قائم تجاوزات کے خلاف انتظامیہ کی کارروائیاں جاری ہیں۔ اسسٹنٹ کمشنر رزمک کی ہدایات پر تحصیلدار رزمک غنی وزیر نے پولیٹیکل محرر سب ڈویژن رزمک کے ہمراہ تجاوزات کے خاتمے کے لیے آپریشن کیا۔

کارروائی کے دوران مدرسہ مدینۃ العلوم کے ساتھ واقع دکانوں اور دیگر تجاوزات کو ہٹانے کا سلسلہ جاری رکھا گیا۔ انتظامیہ کے مطابق اس آپریشن کا بنیادی مقصد سرکاری اراضی کو ناجائز قبضوں سے پاک کرنا، عوامی راستوں کو بحال کرنا اور شہریوں کے مفادات کا تحفظ یقینی بنانا ہے۔

حکام کا کہنا ہے کہ رزمک بازار سمیت مختلف مقامات پر سرکاری زمینوں پر قائم غیر قانونی تجاوزات کے خلاف وقتاً فوقتاً کارروائیاں کی جا رہی ہیں تاکہ سرکاری املاک کو قبضہ مافیا سے محفوظ بنایا جاسکے۔ انتظامیہ نے واضح کیا ہے کہ تجاوزات کے خاتمے کے معاملے میں کسی قسم کی رعایت نہیں برتی جائے گی۔

انتظامیہ کے مطابق سرکاری اراضی کو مکمل طور پر تجاوزات سے پاک کرنے اور عوامی گزرگاہوں کی بحالی تک آپریشن جاری رہے گا۔ اس سلسلے میں متعلقہ حکام کو بھی ہدایات جاری کی گئی ہیں کہ وہ کارروائیوں کی نگرانی کریں اور سرکاری زمینوں پر دوبارہ قبضوں کی روک تھام کے لیے اقدامات یقینی بنائیں۔

حکام کا مزید کہنا ہے کہ قانون کی بالادستی، سرکاری املاک کا تحفظ اور عوامی مفاد کا فروغ ضلعی انتظامیہ کی اولین ترجیحات میں شامل ہیں۔ تجاوزات کے خلاف کارروائیوں کا مقصد علاقے میں نظم و ضبط قائم کرنا اور عوام کو آمدورفت کی بہتر سہولیات فراہم کرنا ہے