یومِ ارضیاتی ساعت: وزیرِ اعظم کی قوم سے بھرپور شرکت کی اپیل
اسلام آباد 28 مارچ 2026
شہباز شریف نے کہا ہے کہ ماحولیاتی چیلنجز سے بھرپور موجودہ دور میں Earth Hour اس امر کی یاد دہانی کراتا ہے کہ زمین کا تحفظ ہم سب کی مشترکہ اور بنیادی ذمہ داری ہے۔
یومِ ارضیاتی ساعت کے موقع پر اپنے خصوصی پیغام میں وزیرِ اعظم نے قوم سے اپیل کی کہ وہ اس عالمی مہم میں بھرپور شرکت کریں۔ انہوں نے کہا کہ شہری رات 8 بج کر 30 منٹ سے 9 بج کر 30 منٹ تک ایک گھنٹے کے لیے غیر ضروری بجلی اور روشنیاں بند رکھیں یا کم سے کم استعمال کریں تاکہ ماحولیاتی تحفظ کے عزم کا اظہار کیا جا سکے۔
وزیرِ اعظم نے بتایا کہ اس سال یہ دن “زمین کے لیے ایک گھنٹہ وقف کریں” کے عنوان سے منایا جا رہا ہے، جس کا مقصد ماحول کے تحفظ، توانائی کے مؤثر استعمال اور موسمیاتی تبدیلیوں سے متعلق آگاہی کو فروغ دینا ہے۔
انہوں نے کہا کہ یہ اقدام محض علامتی نہیں بلکہ عالمی سطح پر ایک اہم لمحۂ فکریہ ہے، جو پائیدار اور مضبوط ماحولیاتی مستقبل کے لیے تجدیدِ عزم کا موقع فراہم کرتا ہے۔ ان کے مطابق ایسے شعوری اقدامات مجموعی طور پر مثبت معاشرتی تبدیلی کا باعث بنتے ہیں۔
وزیرِ اعظم نے اس بات پر زور دیا کہ موسمیاتی تبدیلی اور ماحولیاتی بگاڑ کے حوالے سے آج کیے جانے والے فیصلے آنے والی نسلوں کے مستقبل کا تعین کریں گے۔ انہوں نے کہا کہ حکومت ان چیلنجز سے نمٹنے کے لیے موسمیاتی مزاحمت پر مبنی ترقیاتی ایجنڈے پر عملی اقدامات کر رہی ہے۔
