خیبر پختونخوا کے 562 اسکولوں کا تکنیکی سروے مکمل، 346 عمارتیں غیر محفوظ قرار
خیبر پختونخوا میں تعلیمی اداروں کی عمارتوں سے متعلق تکنیکی سروے مکمل کرلیا گیا، جس میں اسکولوں کی تعمیراتی صورتحال کے حوالے سے تشویشناک انکشافات سامنے آئے ہیں۔ سروے کے مطابق بڑی تعداد میں اسکولوں کی عمارتیں طلبہ اور اساتذہ کے لیے غیر محفوظ قرار دی گئی ہیں۔
پشاور سے موصولہ اطلاعات کے مطابق صوبے کے مجموعی طور پر 562 اسکولوں کا تکنیکی معائنہ کیا گیا، جن میں سے 346 اسکولوں کی عمارتوں کو غیر محفوظ قرار دیا گیا ہے۔ اس طرح سروے میں شامل اسکولوں کی 61 فیصد سے زائد عمارتیں غیر محفوظ پائی گئیں۔
رپورٹ کے مطابق 167 اسکولوں کی عمارتوں کو جزوی طور پر محفوظ قرار دیا گیا ہے، جن میں مزید مرمت اور بہتری کی ضرورت ہے۔ دوسری جانب صرف 49 اسکول ایسے ہیں جن کی عمارتوں کو مکمل طور پر محفوظ قرار دیا گیا ہے۔
یہ سروے پشاور کے علاقے دیر کالونی میں اسکول کی چھت گرنے کے المناک سانحے کے بعد شروع کیے گئے اقدامات کا حصہ ہے۔ واقعے میں بچوں اور خاتون ٹیچر کی جانیں ضائع ہونے کے بعد صوبائی حکومت نے تعلیمی اداروں کی عمارتوں کی تعمیراتی حالت اور حفاظتی انتظامات کا جائزہ لینے کا عمل تیز کردیا تھا۔
سروے کے نتائج نے اسکولوں کی عمارتوں کی مرمت، بحالی اور طلبہ کی حفاظت کے لیے فوری اقدامات کی ضرورت کو اجاگر کردیا ہے۔
