ارسا نے آبی ذخائر اور صوبوں کو پانی کی فراہمی کے تازہ اعداد و شمار جاری کر دیے
اسلام آباد: انڈس ریور سسٹم اتھارٹی (ارسا) نے ملک کے آبی ذخائر اور چاروں صوبوں کو فراہم کیے جانے والے پانی کے تازہ اعداد و شمار جاری کر دیے ہیں، جن کے مطابق پانی کی دستیابی میں بہتری کا رجحان سامنے آیا ہے۔ ارسا حکام کے مطابق صوبہ پنجاب کے حصے میں گزشتہ روز کے مقابلے میں 1100 کیوسک پانی کا اضافہ کیا گیا ہے، جبکہ دو روز کے دوران مجموعی طور پر 11 ہزار 200 کیوسک پانی بڑھایا گیا ہے۔ آج پنجاب کو 55 ہزار 900 کیوسک پانی فراہم کیا جا رہا ہے۔
اعداد و شمار کے مطابق صوبہ سندھ کو 50 ہزار کیوسک، خیبر پختونخوا کو 2 ہزار 300 کیوسک اور بلوچستان کو 500 کیوسک پانی فراہم کیا جا رہا ہے۔ اس طرح چاروں صوبوں کو مجموعی طور پر ایک لاکھ 8 ہزار 700 کیوسک پانی مہیا کیا جا رہا ہے۔ ارسا کا کہنا ہے کہ پانی کی فراہمی میں اضافے سے پن بجلی کی پیداوار میں اضافہ ہوگا جس کے نتیجے میں بجلی کے شارٹ فال میں مزید کمی متوقع ہے۔
دریاؤں میں پانی کی آمد و اخراج کی صورتحال بھی جاری کر دی گئی ہے۔ دریائے سندھ میں پانی کی آمد 36 ہزار 400 کیوسک جبکہ اخراج 30 ہزار کیوسک ریکارڈ کیا گیا۔ دریائے جہلم میں آمد 32 ہزار 300 اور اخراج 30 ہزار کیوسک رہا۔ چشمہ بیراج میں پانی کی آمد 68 ہزار 300 کیوسک اور اخراج 54 ہزار 900 کیوسک نوٹ کیا گیا۔
اسی طرح دریائے چناب میں پانی کی آمد 17 ہزار 500 کیوسک اور اخراج 5 ہزار 100 کیوسک ریکارڈ ہوا، جبکہ دریائے کابل میں پانی کی آمد اور اخراج دونوں 47 ہزار 200 کیوسک رہے۔ ارسا کے مطابق موجودہ صورتحال آئندہ دنوں میں مزید بہتری کی توقع ظاہر کر رہی ہے۔
