شہباز شریف سے پاکستان میں چین کے سفیر جیانگ زی ڈونگ نے اہم ملاقات کی، جس میں دوطرفہ تعلقات، خطے کی صورتحال اور پاکستان کی امن کے لیے جاری کوششوں پر تفصیلی تبادلہ خیال کیا گیا۔
ملاقات میں نائب وزیرِ اعظم و وزیرِ خارجہ اسحاق ڈار، وزیرِ منصوبہ بندی و ترقی احسن اقبال، وزیرِ اطلاعات عطاء اللہ تارڑ، وزیراعظم کے معاونِ خصوصی سید طارق فاطمی اور سیکریٹری خارجہ آمنہ بلوچ بھی شریک تھے۔ اعلیٰ سطحی اس ملاقات میں پاکستان اور چین کے اسٹریٹجک تعلقات کو مزید مضبوط بنانے پر اتفاق کیا گیا۔
وزیراعظم شہباز شریف نے چینی صدر اور وزیراعظم کے لیے نیک خواہشات کا اظہار کیا اور دونوں ممالک کے درمیان قریبی تعاون پر اطمینان کا اظہار کیا۔ انہوں نے کہا کہ پاکستان کو چین کے ساتھ اسٹریٹجک شراکت داری پر فخر ہے اور یہ تعلق وقت کے ساتھ مزید مضبوط ہو رہا ہے۔
وزیراعظم نے اس موقع پر کہا کہ پاکستان اور چین کے درمیان تعاون صرف معاشی یا سفارتی سطح تک محدود نہیں بلکہ خطے کے امن اور استحکام کے لیے بھی اہم کردار ادا کر رہا ہے۔ انہوں نے کہا کہ دونوں ممالک کی قیادت کا وژن خطے میں ترقی، خوشحالی اور امن کے فروغ پر مبنی ہے۔
ملاقات میں مشرق وسطیٰ کی موجودہ صورتحال اور پاکستان کی امن کے لیے جاری سفارتی کوششوں پر بھی تفصیلی گفتگو ہوئی۔ وزیراعظم نے کہا کہ پاکستان خطے میں کشیدگی کم کرنے اور مذاکرات کے ذریعے مسائل کے حل کے لیے مسلسل کوششیں کر رہا ہے۔
چینی سفیر نے پاکستان کی امن کوششوں کو سراہتے ہوئے وزیراعظم کا شکریہ ادا کیا اور کہا کہ چین پاکستان کے ساتھ تعلقات کو انتہائی اہمیت دیتا ہے۔ انہوں نے کہا کہ چینی قیادت پاکستان کے ساتھ دوستی کو مزید مستحکم بنانے کے لیے پرعزم ہے اور یہ تعلق نئی بلندیوں کی طرف بڑھ رہا ہے۔
چینی سفیر نے اس بات کا اعادہ بھی کیا کہ چین پاکستان کے ساتھ مختلف شعبوں میں تعاون جاری رکھے گا، جن میں معیشت، ترقیاتی منصوبے اور علاقائی امن کے اقدامات شامل ہیں۔ انہوں نے کہا کہ دونوں ممالک کے درمیان اعتماد اور تعاون خطے کے استحکام کے لیے اہم ستون ہیں۔
ملاقات کے دوران دونوں فریقین نے اس بات پر اتفاق کیا کہ موجودہ عالمی اور علاقائی چیلنجز کا مقابلہ مشترکہ حکمت عملی اور مسلسل رابطے کے ذریعے ہی ممکن ہے۔
وزیراعظم نے کہا کہ پاکستان اور چین کی دوستی وقت کے ساتھ مزید گہمیری ہو رہی ہے اور دونوں ممالک ہر مشکل وقت ں ایک دوسرے کے ساتھ کھڑے رہے ہیں۔
ملاقات کے اختتام پر اس عزم کا اظہار کیا گیا کہ پاکستان اور چین اپنے اسٹریٹجک تعلقات کو مزید وسعت دیں گے اور خطے میں امن، ترقی اور استحکام کے لیے مشترکہ کوششیں جاری رکھیں گے۔
