دبئی کے حکمران کا فلسطینیوں کیلئے امداد کا اعلان، غزہ میں 50 ہزار افراد کیلئے خیمے بھجوانے کی ہدایت
شیخ محمد بن راشد المکتوم نے متاثرہ فلسطینی خاندانوں کو خیمے فراہم کرنے کا فیصلہ کرلیا، اقوام متحدہ نے غزہ میں پناہ گاہوں اور سردی سے بچاؤ کے سامان کی شدید قلت سے خبردار کردیا
دبئی: متحدہ عرب امارات کے نائب صدر، وزیراعظم اور دبئی کے حکمران شیخ محمد بن راشد المکتوم نے فلسطینی عوام کے لیے انسانی ہمدردی کی بنیاد پر امداد کا اعلان کرتے ہوئے غزہ میں 50 ہزار افراد کے لیے خیمے بھجوانے کی ہدایت کردی ہے۔
تفصیلات کے مطابق شیخ محمد بن راشد المکتوم نے غزہ میں بے گھر ہونے والے فلسطینی خاندانوں کی مشکلات کے پیش نظر انہیں عارضی رہائش فراہم کرنے کے لیے خیموں کی فراہمی کا فیصلہ کیا ہے۔ اس اقدام کا مقصد متاثرہ خاندانوں کو محفوظ پناہ گاہیں فراہم کرنا اور مشکل حالات میں ان کی بنیادی ضروریات پوری کرنے میں مدد دینا ہے۔
اعلان کے مطابق امارات کی جانب سے فراہم کیے جانے والے خیمے اماراتی امدادی مشن برائے غزہ کے تحت تقسیم کیے جائیں گے، جس کے ذریعے امداد مستحق اور متاثرہ فلسطینی خاندانوں تک پہنچائی جائے گی۔
شیخ محمد بن راشد المکتوم کی جانب سے یہ اعلان ایسے وقت میں سامنے آیا ہے جب غزہ میں بے گھر ہونے والے ہزاروں خاندان شدید مشکلات کا سامنا کر رہے ہیں اور انہیں رہائش، خوراک اور سردی سے بچاؤ کے لیے ضروری سامان کی ضرورت ہے۔
دوسری جانب اقوام متحدہ نے بھی غزہ میں انسانی بحران اور امدادی سامان کی قلت پر تشویش کا اظہار کیا ہے۔ عالمی ادارے کے مطابق غزہ کے باہر تقریباً ایک لاکھ 50 ہزار خیمے داخلے کے منتظر ہیں، تاہم امدادی سامان کی ترسیل میں رکاوٹوں کے باعث یہ سامان تاحال ضرورت مند افراد تک نہیں پہنچ سکا۔
اقوام متحدہ نے خبردار کیا ہے کہ غزہ میں پناہ گاہوں اور سردی سے بچاؤ کے ضروری سامان کے ذخائر ختم ہوچکے ہیں، جس کے باعث بے گھر فلسطینی خاندانوں کو مزید مشکلات کا سامنا ہے۔ موسم کی شدت میں اضافے کے ساتھ خیموں، کمبلوں اور دیگر بنیادی ضروریات کی اہمیت بھی بڑھ گئی ہے۔
عالمی ادارے نے متعلقہ حکام سے مطالبہ کیا ہے کہ فلسطینی عوام کے لیے امدادی سامان کی غزہ تک رسائی پر عائد پابندیاں ختم کی جائیں تاکہ انسانی ہمدردی کی بنیاد پر فراہم کی جانے والی امداد بلا رکاوٹ متاثرہ افراد تک پہنچائی جاسکے۔
غزہ میں جاری انسانی بحران کے تناظر میں متحدہ عرب امارات کی جانب سے 50 ہزار افراد کے لیے خیموں کی فراہمی کا اعلان متاثرہ خاندانوں کو عارضی رہائش فراہم کرنے کی کوششوں کا حصہ ہے۔
