اسسٹنٹ کمشنر لوئر اورکزئی کا کلایہ بازار کا دورہ، صفائی اور عوامی سہولیات کا جائزہ
لوئر اورکزئی: ڈپٹی کمشنر اورکزئی یوسف علی مہمند کی خصوصی ہدایات پر اسسٹنٹ کمشنر عمر مختار نے کلایہ ہیڈکوارٹر چوک بازار کا دورہ کیا، جہاں بازار کی مجموعی صورتحال، صفائی ستھرائی، عوامی سہولیات اور انتظامی امور کا تفصیلی جائزہ لیا گیا۔
دورے کے دوران اسسٹنٹ کمشنر نے بازار کے مختلف حصوں کا معائنہ کیا اور صفائی کے انتظامات سمیت شہریوں کو فراہم کی جانے والی سہولیات کا جائزہ لیا۔ انہوں نے بازار میں موجود مسائل اور عوام کو درپیش مشکلات کا بھی مشاہدہ کیا۔
اس موقع پر متعلقہ افراد اور عملے کو ہدایت کی گئی کہ بازار میں صفائی ستھرائی کے نظام کو بہتر بنایا جائے اور عوام کو درپیش مسائل کے فوری حل کے لیے مؤثر اقدامات کیے جائیں۔
اسسٹنٹ کمشنر عمر مختار نے واضح کیا کہ عوامی سہولیات کی بہتری اور بازار میں مناسب انتظامی نظم و ضبط برقرار رکھنا ضلعی انتظامیہ کی ترجیحات میں شامل ہے۔ انہوں نے متعلقہ اہلکاروں کو اپنی ذمہ داریاں احسن طریقے سے ادا کرنے اور انتظامی امور میں غفلت سے گریز کرنے کی ہدایت بھی کی۔
ضلعی انتظامیہ اورکزئی کے مطابق عوامی مسائل کے حل، بازاروں کی بہتری اور شہری سہولیات کی فراہمی کے لیے مختلف علاقوں میں معائنوں کا سلسلہ جاری رکھا جائے گا۔
