سوات: چارباغ کے پہاڑی علاقوں میں پولیس کا گرینڈ سرچ اینڈ سٹرائیک آپریشن
سوات: ضلع سوات کی تحصیل چارباغ کے مختلف پہاڑی علاقوں میں امن و امان کے قیام اور جرائم پیشہ و شرپسند عناصر کے خلاف پولیس نے گرینڈ سرچ اینڈ سٹرائیک آپریشن کیا۔ آپریشن میں پولیس، ایلیٹ فورس، سی ٹی ڈی، بی ڈی ایس اور دیگر متعلقہ اداروں کے اہلکاروں نے حصہ لیا۔
پولیس کے مطابق یہ کارروائی ریجنل پولیس آفیسر ملاکنڈ زاہد نواز مروت کے وژن ’’پرامن معاشرہ‘‘ اور ڈسٹرکٹ پولیس آفیسر سوات محمد عمر خان کی ہدایات پر عمل میں لائی گئی۔ آپریشن کا مقصد علاقے میں امن و امان کی صورتحال کو مزید مستحکم بنانا اور ملک دشمن و جرائم پیشہ عناصر کی سرگرمیوں کی روک تھام کرنا تھا۔
سرچ اینڈ سٹرائیک آپریشن کی نگرانی ایس ڈی پی او سرکل چارباغ رحمت علی خان نے کی، جبکہ ایس ایچ او تھانہ چارباغ فرمان علی بھی کارروائی میں شریک تھے۔ آپریشن میں ڈسٹرکٹ پولیس کے علاوہ ایلیٹ فورس، کاؤنٹر ٹیررازم ڈیپارٹمنٹ (سی ٹی ڈی)، بم ڈسپوزل اسکواڈ (بی ڈی ایس) اور ڈی ایس بی کے اہلکاروں نے حصہ لیا۔
پولیس حکام کے مطابق کارروائی تھانہ چارباغ کی حدود میں واقع مختلف علاقوں کنڈاو، زنگے، منگلتان، خندگ اور ان سے ملحقہ پہاڑی مقامات پر کی گئی۔ آپریشن کے دوران مختلف مقامات کی تلاشی لی گئی اور شرپسند عناصر کے ممکنہ ٹھکانوں کا جائزہ لیا گیا۔
مشترکہ آپریشن میں مختلف قانون نافذ کرنے والے اداروں کی شرکت کا مقصد سیکیورٹی انتظامات کو مؤثر بنانا، مشتبہ سرگرمیوں کی نشاندہی اور علاقے میں امن و امان برقرار رکھنے کے لیے مربوط اقدامات کرنا تھا۔
سوات پولیس کے مطابق شہریوں کے جان و مال کا تحفظ اور علاقے میں پائیدار امن کا قیام پولیس کی اولین ترجیحات میں شامل ہے۔ اس مقصد کے لیے حساس اور پہاڑی علاقوں میں نگرانی اور سرچ آپریشنز کا سلسلہ جاری رکھا جائے گا۔
پولیس حکام نے اس عزم کا اظہار کیا کہ امن و امان میں خلل ڈالنے والے عناصر کے خلاف قانون کے مطابق کارروائیاں جاری رہیں گی اور دیگر متعلقہ اداروں کے ساتھ تعاون کو مزید مؤثر بنایا جائے گا۔
