حضرت بہاؤالدین زکریا ملتانیؒ کے عرس پر 22 جولائی کو ملتان میں مقامی تعطیل کا اعلان
حضرت بہاؤالدین زکریا ملتانیؒ کے 787ویں سالانہ عرس کے موقع پر ضلعی انتظامیہ نے 22 جولائی کو ضلع ملتان میں مقامی تعطیل کا اعلان کر دیا ہے۔ اس سلسلے میں ڈپٹی کمشنر ملتان ڈاکٹر فیصل سلیم کی جانب سے باقاعدہ نوٹیفکیشن بھی جاری کر دیا گیا۔
نوٹیفکیشن کے مطابق 22 جولائی کو ضلع ملتان کے تمام ضلعی سرکاری دفاتر، سرکاری ادارے اور ضلعی حکومت کے ماتحت دفاتر بند رہیں گے، جبکہ تعطیل کا مقصد زائرین اور شہریوں کو عرس کی مذہبی تقریبات میں شرکت کے لیے سہولت فراہم کرنا ہے۔
ضلعی انتظامیہ کے مطابق عرس کے موقع پر ملک بھر سے ہزاروں عقیدت مند ملتان پہنچتے ہیں، جہاں حضرت بہاؤالدین زکریا ملتانیؒ کے مزار پر خصوصی دعائیں، محافلِ ذکر، قرآن خوانی اور دیگر مذہبی تقریبات منعقد کی جاتی ہیں۔
انتظامیہ نے بتایا کہ زائرین کی بڑی تعداد کے پیش نظر سکیورٹی، ٹریفک مینجمنٹ، صفائی، طبی سہولیات اور دیگر انتظامات کو حتمی شکل دی جا رہی ہے۔ متعلقہ اداروں کو ہدایت کی گئی ہے کہ زائرین کو ہر ممکن سہولت فراہم کی جائے اور امن و امان کی صورتحال برقرار رکھی جائے۔
حضرت بہاؤالدین زکریا ملتانیؒ برصغیر کے عظیم صوفی بزرگوں میں شمار ہوتے ہیں اور انہوں نے سلسلہ سہروردیہ کی تعلیمات کے فروغ میں نمایاں کردار ادا کیا۔ ہر سال ان کے عرس پر ملک بھر سے لاکھوں عقیدت مند ملتان آتے ہیں اور ان کی دینی و روحانی خدمات کو خراجِ عقیدت پیش کرتے ہیں۔
