واہگہ بارڈر پر پرچم اتارنے کی پروقار تقریب، پاکستان زندہ باد کے فلک شگاف نعرے
لاہور: پاکستان کے 79ویں یومِ آزادی کے موقع پر واہگہ بارڈر پر پرچم اتارنے کی پروقار تقریب منعقد ہوئی، جس میں شہریوں کی بڑی تعداد نے شرکت کی۔ تقریب کے دوران قومی جذبہ عروج پر رہا اور پورا پنڈال ملی نغموں اور پاکستان زندہ باد کے نعروں سے گونجتا رہا۔
تقریب کا آغاز قومی ترانے سے ہوا، جبکہ شرکا نے ہاتھوں میں قومی پرچم تھام رکھے تھے۔ نوجوانوں کا جوش و خروش خاص طور پر دیدنی رہا اور بچوں، خواتین اور بزرگوں نے بھی بھرپور انداز میں تقریب میں شرکت کی۔
پرچم اتارنے کی تقریب کے دوران نعرۂ تکبیر، پاکستان زندہ باد اور پاک فوج زندہ باد کے فلک شگاف نعرے بلند کیے گئے۔ پاکستان رینجرز کے جوانوں کی ولولہ انگیز پریڈ نے تقریب میں موجود شہریوں کے جذبۂ حب الوطنی کو مزید بڑھا دیا۔
پاکستان رینجرز کے دستے میں خواتین اہلکاروں نے بھی شرکت کی اور اپنی پیشہ ورانہ صلاحیت اور نظم و ضبط کا مظاہرہ کیا۔ شیر دل جوانوں کی قدموں کی دھمک اور وطن کے دفاع کے عزم نے پنڈال میں موجود شرکا کو پرجوش کردیا۔
تقریب کے دوران ملی نغمے بھی پیش کیے گئے، جن سے جشنِ آزادی کا ماحول مزید پرجوش ہوگیا۔ شہریوں نے رینجرز کے جوانوں کی پریڈ اور مختلف مظاہروں کو بھرپور داد دی اور مسلسل قومی نعرے بلند کرتے رہے۔
پنڈال میں موجود بچوں، بزرگوں اور خواتین نے پاکستان رینجرز کے جوانوں کا حوصلہ بڑھایا اور قومی پرچم لہراتے ہوئے ملک سے محبت کا اظہار کیا۔ شہریوں کا کہنا تھا کہ واہگہ بارڈر کی یہ تقریب نہ صرف جشنِ آزادی کی خوشیوں کو دوبالا کرتی ہے بلکہ وطن کی حفاظت کرنے والے جوانوں کو خراجِ تحسین پیش کرنے کا بھی موقع فراہم کرتی ہے۔
واہگہ بارڈر پر ہر سال ہونے والی پرچم اتارنے کی تقریب پاکستان کی قومی و عسکری روایات میں نمایاں مقام رکھتی ہے۔ یومِ آزادی کے موقع پر اس تقریب میں عوام کی بڑی تعداد کی شرکت قومی یکجہتی، حب الوطنی اور وطن سے گہری وابستگی کی عکاس ہے۔
تقریب کا اختتام قومی جذبے، پاکستان کے لیے نیک تمناؤں اور وطن کی سلامتی و خوشحالی کی دعاؤں کے ساتھ ہوا۔
