اسحاق ڈار کی اقوام متحدہ کے سیکریٹری جنرل سے ملاقات، علاقائی و عالمی امور پر تبادلہ خیال
اسلام آباد: نائب وزیراعظم و وزیر خارجہ سینیٹر محمد اسحاق ڈار نے اقوام متحدہ کے سیکریٹری جنرل انتونیو گوتریس سے وزارت خارجہ میں ملاقات کی، جس میں علاقائی اور عالمی امن و سلامتی سمیت مختلف اہم امور پر تبادلہ خیال کیا گیا۔
ترجمان دفتر خارجہ کے مطابق ملاقات میں فلسطین، جموں و کشمیر، افغانستان، انسداد دہشت گردی اور کثیرالجہتی نظام کے مستقبل سمیت متعدد علاقائی و عالمی معاملات زیر بحث آئے۔
اسحاق ڈار نے اقوام متحدہ کے سیکریٹری جنرل کو جموں و کشمیر اور سندھ طاس معاہدے سے متعلق پاکستان کے مؤقف سے آگاہ کیا۔ انہوں نے جموں و کشمیر کے تنازع کے اقوام متحدہ کی سلامتی کونسل کی متعلقہ قراردادوں کے مطابق منصفانہ اور پُرامن حل کے لیے پاکستان کے مطالبے کا اعادہ کیا۔
ملاقات کے دوران خطے میں امن و سلامتی کی صورتحال اور عالمی سطح پر درپیش مختلف چیلنجز پر بھی بات چیت کی گئی۔ دونوں جانب سے کثیرالجہتی نظام اور عالمی امن کے لیے اقوام متحدہ کے کردار کی اہمیت پر بھی تبادلہ خیال کیا گیا۔
ملاقات میں افغانستان اور انسداد دہشت گردی سے متعلق امور بھی زیر بحث آئے، جبکہ عالمی سطح پر جاری تنازعات کے حل اور امن و سلامتی کے فروغ کے لیے سفارتی کوششوں کی اہمیت پر زور دیا گیا۔
