امریکا ایران کشیدگی، عالمی منڈی میں خام تیل کی قیمتیں بڑھ گئیں
امریکا اور ایران کے درمیان جاری کشیدگی کے باعث عالمی منڈی میں خام تیل کی قیمتوں میں مزید اضافہ ریکارڈ کیا گیا ہے، جس سے عالمی سطح پر توانائی کی مارکیٹ میں بے یقینی بڑھ گئی ہے۔
رپورٹس کے مطابق امریکا ایران کشیدگی کے نتیجے میں تیل کی عالمی سپلائی اور اس سے متعلق معاملات پر خدشات پیدا ہوئے ہیں، جس کے باعث سرمایہ کاروں اور عالمی مارکیٹ پر دباؤ بڑھا اور خام تیل کی قیمتوں میں نمایاں اضافہ دیکھا گیا۔
عالمی منڈی میں برینٹ خام تیل کی قیمت 97 ڈالر فی بیرل سے تجاوز کر گئی ہے، جبکہ امریکی خام تیل ڈبلیو ٹی آئی کی قیمت بھی 92 ڈالر فی بیرل سے زیادہ ریکارڈ کی گئی۔ قیمتوں میں اضافے سے عالمی سطح پر پیٹرولیم مصنوعات کی قیمتوں میں مزید اضافے کے خدشات پیدا ہوگئے ہیں۔
دوسری جانب اماراتی خام تیل مربان کی قیمت بھی 106 ڈالر فی بیرل کی سطح عبور کر گئی ہے، جو خطے میں تیل کی مارکیٹ پر بڑھتے ہوئے دباؤ کی نشاندہی کرتی ہے۔
برینٹ خام تیل عالمی سطح پر تیل کی قیمتوں کے ایک اہم معیار کے طور پر استعمال ہوتا ہے، جبکہ ڈبلیو ٹی آئی امریکی مارکیٹ کا نمایاں بینچ مارک ہے۔ اسی طرح اماراتی مربان خام تیل بھی عالمی توانائی مارکیٹ میں اہم حیثیت رکھتا ہے۔
ماہرین کے مطابق امریکا اور ایران کے درمیان کشیدگی میں مزید اضافہ ہوا تو عالمی تیل کی سپلائی اور قیمتوں پر اس کے اثرات مزید نمایاں ہوسکتے ہیں۔
