کراچی، انمول عرف پنکی کے موبائل فون سے 100 جی بی سے زائد مشکوک ڈیٹا برآمد، فارنزک رپورٹ میں اہم انکشافات
کراچی: منشیات فروشی کے الزام میں گرفتار ملزمہ انمول عرف پنکی کے موبائل فون سے بھاری مقدار میں غیر معمولی اور مشکوک ڈیٹا برآمد ہوا ہے، جس نے تفتیشی حکام کو اہم شواہد فراہم کیے ہیں۔
این سی سی آئی اے کی جانب سے تیار کی گئی فارنزک رپورٹ تفتیشی افسر کو موصول ہو گئی ہے، جس کے مطابق ملزمہ کے موبائل فون سے 100 جی بی سے زائد ڈیٹا ریکور کیا گیا ہے۔ حکام کا کہنا ہے کہ یہ ڈیٹا کیس کی تفتیش میں اہم پیش رفت ثابت ہو سکتا ہے۔
ذرائع کے مطابق موبائل فون سے تقریباً 75 ہزار تصاویر اور دیگر فائلز بھی حاصل کی گئی ہیں، جن میں مختلف مالی لین دین اور مشتبہ سرگرمیوں کے شواہد شامل ہونے کا امکان ظاہر کیا جا رہا ہے۔
فارنزک رپورٹ کے مطابق ڈیٹا میں آن لائن ٹرانزیکشنز کی تفصیلات، کلائنٹس سے رقم وصولی کی بینک سلپس کے اسکرین شاٹس اور دیگر مالی ریکارڈ شامل ہیں، جو مبینہ طور پر غیر قانونی مالی سرگرمیوں کی نشاندہی کرتے ہیں۔
مزید برآں، موبائل فون سے 13 ہزار سے زائد افراد کے کانٹیکٹس بھی ریکور کیے گئے ہیں، جس سے مبینہ نیٹ ورک کے حجم اور روابط کے بارے میں اہم معلومات حاصل ہونے کی توقع ہے۔
تحقیقات کے مطابق موبائل فون میں 42 ہزار سے زائد کال لاگز بھی موجود تھے، جو مختلف افراد کے ساتھ رابطوں کی تفصیلات ظاہر کرتے ہیں۔ تفتیشی ذرائع کا کہنا ہے کہ ان کال ریکارڈز کا تفصیلی تجزیہ کیا جا رہا ہے تاکہ نیٹ ورک کے دیگر ممکنہ کرداروں کو بے نقاب کیا جا سکے۔
ذرائع کے مطابق ملزمہ نے ایک ہی موبائل فون میں دو مختلف واٹس ایپ اکاؤنٹس بھی استعمال کیے ہوئے تھے، جس سے ظاہر ہوتا ہے کہ وہ مختلف حلقوں کے ساتھ رابطے میں تھی۔
تفتیشی حکام کا کہنا ہے کہ ریکور ہونے والا ڈیٹا کیس میں اہم ثبوت کے طور پر استعمال کیا جا سکتا ہے اور اس کی روشنی میں مزید گرفتاریاں اور پیش رفت متوقع ہیں۔
مزید تحقیقات جاری ہیں جبکہ متعلقہ ادارے ڈیجیٹل شواہد کا باریک بینی سے جائزہ لے رہے ہیں۔
