ایران میں زیادہ پیٹرول استعمال کرنے والوں کے لیے قیمت دگنی کرنے کا اعلان
تہران: ایران کی حکومت نے ماہانہ مقررہ حد سے زیادہ پیٹرول استعمال کرنے والے صارفین کے لیے ایندھن کی قیمت میں نمایاں اضافہ کرنے کا اعلان کر دیا ہے، جس کا اطلاق 8 ستمبر سے ہوگا۔
ایرانی حکومت کی ترجمان فاطمہ مہاجرانی کے مطابق جن صارفین کا ماہانہ پیٹرول استعمال 110 لیٹر سے تجاوز کرے گا، انہیں اضافی پیٹرول کے لیے فی لیٹر 10 ہزار تومان ادا کرنا ہوں گے۔ اس سے قبل مقررہ حد سے زائد پیٹرول بھی 5 ہزار تومان فی لیٹر کی قیمت پر دستیاب تھا، تاہم نئی پالیسی کے تحت اس کی قیمت دگنی کر دی گئی ہے۔
حکومت کا کہنا ہے کہ ماہانہ 110 لیٹر تک پیٹرول استعمال کرنے والے صارفین کے لیے موجودہ قیمت میں کوئی تبدیلی نہیں کی گئی۔ نئی قیمت کا اطلاق صرف ان صارفین پر ہوگا جو مقررہ ماہانہ حد سے زیادہ ایندھن استعمال کرتے ہیں۔
ایرانی حکومت کی جانب سے یہ فیصلہ ایسے وقت میں سامنے آیا ہے جب ملک میں پیٹرول کی کھپت، ایندھن کے استعمال کو منظم کرنے اور سرکاری سبسڈی کے بوجھ کو کم کرنے پر توجہ دی جا رہی ہے۔ نئی قیمت سے زیادہ پیٹرول استعمال کرنے والے صارفین کے اخراجات میں نمایاں اضافہ متوقع ہے۔
حکام کے مطابق مقررہ حد برقرار رکھنے کا مقصد عام صارفین کو اضافی مالی بوجھ سے بچانا جبکہ زیادہ ایندھن استعمال کرنے والوں سے نسبتاً زیادہ قیمت وصول کرنا ہے۔ نئی پالیسی کے نفاذ کے بعد اس کے اثرات اور عوامی ردعمل بھی اہم قرار دیے جا رہے ہیں۔
