ہفتۂ شہداء پولیس: تھانہ شلمان میں شہداء کو شاندار خراجِ عقیدت، واک کا انعقاد
خیبر: ضلع خیبر میں جاری ہفتۂ شہداء پولیس کے سلسلے میں تھانہ شلمان کے زیرِ اہتمام ایک پروقار واک کا انعقاد کیا گیا، جس میں شہداء پولیس کی عظیم قربانیوں کو زبردست خراجِ عقیدت پیش کیا گیا۔ یہ تقریب ڈسٹرکٹ پولیس آفیسر (ڈی پی او) خیبر وقار احمد کی خصوصی ہدایات پر منعقد کی گئی، جس کا مقصد شہداء کی لازوال خدمات کو خراجِ تحسین پیش کرنا اور عوام میں ان کی قربانیوں کی اہمیت کو اجاگر کرنا تھا۔
واک میں قبائلی عمائدین، سیکیورٹی فورسز کے اہلکاروں، پولیس افسران، جوانوں، سماجی شخصیات اور مقامی شہریوں نے بھرپور شرکت کی۔ شرکاء نے ہاتھوں میں قومی پرچم اور بینرز اٹھا رکھے تھے، جن پر شہداء پولیس کو خراجِ عقیدت پیش کرنے اور وطن سے محبت کے مختلف پیغامات درج تھے۔ واک کے دوران شرکاء نے پاکستان زندہ باد، خیبر پولیس پائندہ باد اور شہداء پولیس کو سلام جیسے پُرجوش نعرے بھی بلند کیے۔
تقریب سے خطاب کرتے ہوئے مقررین نے کہا کہ خیبر پولیس کے شہداء نے دہشت گردی، جرائم اور امن دشمن عناصر کے خلاف اپنی جانوں کا نذرانہ پیش کر کے علاقے میں امن و امان کے قیام کے لیے ناقابلِ فراموش خدمات انجام دیں۔ انہوں نے کہا کہ شہداء کی قربانیاں پوری قوم کے لیے باعثِ فخر ہیں اور ان کی بہادری، جرات اور فرض شناسی آنے والی نسلوں کے لیے مشعلِ راہ ہے۔
مقررین کا کہنا تھا کہ پولیس کے شہداء نے اپنے خون سے امن کی بنیادیں مضبوط کیں اور عوام کے جان و مال کے تحفظ کے لیے ہر مشکل کا بہادری سے مقابلہ کیا۔ انہوں نے اس عزم کا اظہار کیا کہ شہداء کے مشن کو ہر صورت جاری رکھا جائے گا اور ملک سے دہشت گردی اور جرائم کے مکمل خاتمے کے لیے پولیس اور دیگر قانون نافذ کرنے والے ادارے اپنی ذمہ داریاں اسی جذبے سے نبھاتے رہیں گے۔
واک کے شرکاء نے اس بات کا اعادہ کیا کہ وطن عزیز کے امن، سلامتی اور استحکام کے لیے شہداء کی قربانیوں کو کبھی فراموش نہیں کیا جائے گا۔ انہوں نے کہا کہ شہداء کے اہل خانہ کی عزت و تکریم اور ان کی فلاح و بہبود بھی پوری قوم کی مشترکہ ذمہ داری ہے۔
ہفتۂ شہداء پولیس کے تحت ضلع خیبر میں مختلف تقریبات، دعائیہ اجتماعات اور آگاہی پروگرام بھی منعقد کیے جا رہے ہیں، جن کا مقصد عوام اور پولیس کے درمیان اعتماد کو مزید مضبوط بنانا اور شہداء کی قربانیوں کو نئی نسل تک پہنچانا ہے۔ شرکاء نے آخر میں ملک میں پائیدار امن، ترقی اور شہداء کے بلند درجات کے لیے خصوصی دعا بھی کی
