مشرقِ وسطیٰ میں کشیدگی، عالمی منڈی میں تیل کی قیمتوں میں 4 فیصد سے زائد اضافہ
مشرقِ وسطیٰ میں بڑھتی ہوئی کشیدگی اور خطے میں مزید امریکی فوجی تعیناتی کی اطلاعات کے بعد عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے۔
غیر ملکی خبر ایجنسی کے مطابق عالمی مارکیٹ میں برطانوی خام تیل کی قیمت 4 فیصد سے زیادہ اضافے کے بعد 102.31 ڈالر فی بیرل تک پہنچ گئی، جبکہ امریکی ویسٹ ٹیکساس انٹرمیڈیٹ (WTI) خام تیل 92.87 ڈالر فی بیرل پر بند ہوا۔
رپورٹ کے مطابق امریکا مشرقِ وسطیٰ میں مزید تقریباً 10 ہزار فوجی تعینات کرنے کی تیاری کر رہا ہے۔ خطے میں ممکنہ فوجی کشیدگی بڑھنے کے خدشات کے باعث سرمایہ کاروں میں تشویش پیدا ہوئی، جس کا اثر عالمی سطح پر تیل کی قیمتوں پر پڑا۔
مشرقِ وسطیٰ عالمی توانائی کی منڈی کے لیے انتہائی اہم خطہ ہے، جہاں سے دنیا کی بڑی مقدار میں خام تیل کی سپلائی ہوتی ہے۔ اسی وجہ سے خطے میں فوجی کشیدگی یا سپلائی میں ممکنہ رکاوٹ کے خدشات تیل کی قیمتوں میں فوری اتار چڑھاؤ کا باعث بن سکتے ہیں۔
ماہرین کے مطابق اگر کشیدگی مزید بڑھتی ہے یا تیل کی ترسیل متاثر ہونے کا خدشہ پیدا ہوتا ہے تو عالمی منڈی میں قیمتوں پر مزید دباؤ آسکتا ہے۔ تیل کی قیمتوں میں مسلسل اضافہ درآمدی ممالک کی معیشتوں، توانائی کے اخراجات اور صارفین پر بھی اثر انداز ہو سکتا ہے۔
