پشاور شہر سے رکشوں سمیت تمام گاڑیوں کی ورکشاپس رنگ روڈ منتقل کرنے کا فیصلہ

ٹریفک کی روانی بہتر بنانے کے لیے ورکشاپس کے لیے مخصوص جگہ مختص کرنے کی ہدایت، تمام سہولیات ایک ہی مقام پر فراہم کی جائیں گی

پشاور میں ٹریفک کی روانی بہتر بنانے اور شہر کی اہم شاہراہوں پر گاڑیوں کے رش اور بے ہنگم پارکنگ کے مسائل کم کرنے کے لیے رکشوں سمیت دیگر گاڑیوں کی تمام ورکشاپس رنگ روڈ منتقل کرنے کا فیصلہ کیا گیا ہے۔

صوبائی حکومت کی ہدایات پر کمشنر پشاور ڈویژن کیپٹن (ر) خالد محمود نے اس سلسلے میں اقدامات شروع کرنے کی ہدایت جاری کر دی ہے۔ کمشنر نے ڈپٹی کمشنر پشاور آفاق وزیر کو ہدایت کی ہے کہ رنگ روڈ پر ورکشاپس کے قیام کے لیے مناسب جگہ کی نشاندہی کرکے اسے مخصوص کیا جائے۔

کمشنر پشاور کے مطابق شہر کے مختلف علاقوں، خصوصاً سٹی سرکلر روڈ پر قائم رکشہ ورکشاپس، مکینیکل ورکشاپس، ڈینٹر اور الیکٹریشن کی دکانیں ٹریفک کی روانی میں رکاوٹ بن رہی ہیں۔ ان ورکشاپس کے باہر گاڑیوں کی مرمت، پارکنگ اور دیگر سرگرمیوں کے باعث سڑکوں پر جگہ کم ہو جاتی ہے، جس سے شہریوں کو آمدورفت میں مشکلات کا سامنا کرنا پڑتا ہے۔

انہوں نے کہا کہ ورکشاپس کو ایک مخصوص مقام پر منتقل کرنے سے نہ صرف شہر کی سڑکوں پر ٹریفک کا دباؤ کم کرنے میں مدد ملے گی بلکہ گاڑیوں کی مرمت سے متعلق کاروباری سرگرمیوں کو بھی منظم کیا جا سکے گا۔

جاری ہدایات کے مطابق رنگ روڈ پر ایسی جگہ مختص کی جائے گی جہاں رکشوں اور دیگر گاڑیوں کی تمام متعلقہ ورکشاپس ایک ہی مقام پر قائم ہوں۔ اس منصوبے کے تحت گاڑیوں کے مالکان اور ڈرائیوروں کو مکینیکل مرمت، ڈینٹنگ، الیکٹریشن اور دیگر ضروری سہولیات ایک ہی جگہ میسر ہوں گی، تاکہ انہیں مختلف علاقوں میں ورکشاپس تلاش کرنے کی ضرورت نہ پڑے۔

کمشنر خالد محمود نے متعلقہ حکام کو جگہ کے انتخاب اور ضروری انتظامات کے حوالے سے اقدامات کرنے کی ہدایت کی ہے۔ اس فیصلے پر عمل درآمد سے شہر کے مرکزی علاقوں میں ورکشاپس کے باعث پیدا ہونے والی رکاوٹوں میں کمی اور ٹریفک نظام کو بہتر بنانے میں مدد ملنے کی توقع ہے