گلوبل سپر لیگ: لاہور قلندرز نے عبداللہ شفیق کو ریلیز کر دیا، شمیم حسین اسکواڈ میں شامل
لاہور: گلوبل سپر لیگ میں شریک پاکستان سپر لیگ کی معروف فرنچائز لاہور قلندرز نے قومی اوپننگ بیٹر عبداللہ شفیق کو ٹورنامنٹ سے ریلیز کر دیا ہے تاکہ وہ قومی ذمہ داریاں سنبھالنے کے لیے پاکستان ٹیسٹ اسکواڈ کو جوائن کر سکیں۔ ان کی جگہ بنگلہ دیش کے جارح مزاج بیٹر شمیم حسین کو ٹیم میں شامل کر لیا گیا ہے۔
لاہور قلندرز کی انتظامیہ کے مطابق عبداللہ شفیق نے گلوبل سپر لیگ میں ٹیم کی نمائندگی کرتے ہوئے اپنی ذمہ داریاں احسن انداز میں نبھائیں۔ انہوں نے گیانا میں کھیلے گئے اپنے آخری میچ میں گیانا ایمیزون واریئرز کے خلاف 13 گیندوں پر 21 رنز کی مختصر مگر مؤثر اننگز کھیلی، جس کے بعد وہ قومی ٹیم کو جوائن کرنے کے لیے روانہ ہو گئے۔
عبداللہ شفیق اب ویسٹ انڈیز کے خلاف جاری ٹیسٹ سیریز میں پاکستان کے اسکواڈ کا حصہ بنیں گے۔ انہیں انجری کے باعث ٹیم سے باہر ہونے والے اوپنر عبداللہ فضل کے متبادل کے طور پر قومی ٹیسٹ اسکواڈ میں شامل کیا گیا ہے۔ پاکستان کرکٹ بورڈ نے حال ہی میں اعلان کیا تھا کہ عبداللہ فضل انجری کے باعث نہ صرف ویسٹ انڈیز کے خلاف باقی ٹیسٹ میچ بلکہ آئندہ انگلینڈ کے خلاف تین ٹیسٹ میچوں کی سیریز سے بھی باہر ہو گئے ہیں۔
لاہور قلندرز نے عبداللہ شفیق کی خدمات پر ان کا شکریہ ادا کرتے ہوئے قومی ذمہ داریوں کے لیے نیک خواہشات کا اظہار کیا ہے۔ دوسری جانب ٹیم مینجمنٹ کو امید ہے کہ نئے شامل ہونے والے بنگلہ دیشی بلے باز شمیم حسین مڈل آرڈر کو مزید مضبوط بنائیں گے اور ٹورنامنٹ کے باقی میچوں میں ٹیم کی کامیابی میں اہم کردار ادا کریں گے۔
کرکٹ حلقوں کا کہنا ہے کہ عبداللہ شفیق کی ٹیسٹ اسکواڈ میں واپسی پاکستان کے لیے مثبت خبر ہے، کیونکہ وہ طویل فارمیٹ میں ایک تجربہ کار اور قابل اعتماد اوپنر سمجھے جاتے ہیں۔ شائقین کو امید ہے کہ وہ ویسٹ انڈیز اور بعد ازاں انگلینڈ کے خلاف سیریز میں قومی ٹیم کی بیٹنگ لائن کو مزید مضبوط بنائیں گے، جبکہ لاہور قلندرز گلوبل سپر لیگ میں نئے کمبی نیشن کے ساتھ اپنی مہم جاری رکھے گی۔
