راولپنڈی میں کیرو ابلیشن سے کینسر کا مفت علاج شروع
راولپنڈی: ہولی فیملی اسپتال میں جدید کیرو ابلیشن مشین کے ذریعے کینسر کے مریضوں کا مفت علاج شروع کردیا گیا ہے، جبکہ راولپنڈی کے 4 اسپتالوں میں اس جدید طریقہ علاج کے لیے مریضوں کے کیسز کی جانچ اور انتخاب کا عمل بھی شروع کردیا گیا ہے۔
ہولی فیملی اسپتال میں کیرو ابلیشن کے لیے 15 پروب پہنچ گئے ہیں۔ ایک پروب کی مالیت 16 لاکھ روپے ہے اور ہر پروب صرف ایک مریض کے علاج کے لیے استعمال ہوگا۔ پہلے مرحلے میں 15 مریضوں کا علاج کیا جائے گا، جس کے بعد مزید مریضوں کے لیے پروب فراہم کیے جائیں گے۔
کیرو ابلیشن کے لیے لیور، پھیپھڑوں، بریسٹ اور کڈنی کے کینسر میں مبتلا ایسے مریضوں کو منتخب کیا جائے گا جن کے ٹیومر کا سائز 2 سینٹی میٹر تک ہو۔ 2 سینٹی میٹر سے بڑے ٹیومر والے مریض اس طریقہ علاج کے لیے اہل نہیں ہوں گے۔
کیرو ابلیشن میں کینسر کے ٹیومر کو انتہائی کم درجہ حرارت، تقریباً منفی 180 ڈگری، پر منجمد کرکے اور بعد ازاں تقریباً 100 ڈگری حرارت کے ذریعے ختم کیا جائے گا۔ اس طریقہ علاج کے لیے مریضوں سے کوئی فیس یا دیگر چارجز وصول نہیں کیے جائیں گے۔
مریضوں کے کیسز ہولی فیملی اسپتال، بینظیر بھٹو اسپتال، راولپنڈی ٹیچنگ اسپتال اور پاکستان کڈنی اینڈ لیور انسٹی ٹیوٹ سے بھجوائے جائیں گے۔ کیرو ابلیشن سے قبل مریضوں کی نوری اسپتال اسلام آباد کے ماہر ڈاکٹرز سے کنسلٹیشن بھی کرائی جائے گی۔
حکام کے مطابق پہلے مرحلے میں 15 مریضوں کا علاج مکمل ہونے کے بعد مزید مریضوں کے لیے پروب فراہم کیے جائیں گے، جس سے اس جدید طریقہ علاج سے مستفید ہونے والے مریضوں کی تعداد میں اضافہ ہوگا۔
کیرو ابلیشن کے ذریعے منتخب مریضوں کو جدید ٹیکنالوجی کے تحت مفت علاج کی سہولت فراہم کرنا کینسر کے مہنگے علاج تک عوام کی رسائی بہتر بنانے کی جانب ایک اہم قدم قرار دیا جا رہا ہے۔
