ایل پی جی صارفین کے لیے بڑا ریلیف، مستحق خاندانوں کو سستی گیس فراہم کرنے کا فیصلہ

بی آئی ایس پی ڈیٹا کی بنیاد پر کم آمدنی والے خاندانوں کو خصوصی سبسڈی ملے گی، ایل پی جی کی درآمد اور قیمتوں کے تعین کا نظام بھی تبدیل کرنے کا اعلان

اسلام آباد: وفاقی حکومت نے ایل پی جی صارفین کو ریلیف فراہم کرنے اور گیس کی قیمتوں میں منافع خوری روکنے کے لیے نئے اقدامات کا اعلان کردیا ہے۔ حکومت نے فیصلہ کیا ہے کہ بے نظیر انکم سپورٹ پروگرام (بی آئی ایس پی) کے ڈیٹا کی بنیاد پر مستحق اور کم آمدنی والے خاندانوں کو ایل پی جی پر خصوصی ریلیف فراہم کیا جائے گا، تاکہ مہنگائی کے باعث متاثر ہونے والے گھرانوں کو سستی گیس دستیاب ہوسکے۔

وزیر پیٹرولیم علی پرویز ملک نے اپنے بیان میں کہا ہے کہ حکومت کا بنیادی مقصد عوام کو مناسب قیمت پر ایل پی جی کی فراہمی یقینی بنانا اور اس شعبے میں غیر ضروری منافع خوری کا خاتمہ کرنا ہے۔ ان کے مطابق عالمی منڈی میں موجودہ قیمتوں کے حساب سے ایل پی جی کی فی کلو قیمت تقریباً 450 روپے بنتی ہے، تاہم بعض عناصر کی جانب سے اس شعبے میں ناجائز منافع خوری کی جارہی ہے۔

وزیر پیٹرولیم نے بتایا کہ ایل پی جی کی درآمد کا عمل مسابقتی بنیادوں پر کھولا جارہا ہے، جس سے مختلف کمپنیوں کو اس کاروبار میں حصہ لینے کا موقع ملے گا۔ اس اقدام کا مقصد مارکیٹ میں مقابلے کی فضا پیدا کرنا اور صارفین کو مناسب نرخوں پر گیس کی فراہمی یقینی بنانا ہے۔

انہوں نے مزید کہا کہ ایل پی جی سے متعلق تمام کمپنیوں کو اپنی ویب سائٹس پر گیس کی قیمتیں نمایاں طور پر ظاہر کرنے کی ہدایت کی جائے گی، تاکہ صارفین مختلف کمپنیوں کے نرخوں کا موازنہ کرسکیں اور قیمتوں میں شفافیت برقرار رہے۔

علی پرویز ملک کے مطابق مقامی سطح پر پیدا ہونے والی ایل پی جی کی فراہمی بھی نیلامی کے ذریعے کی جائے گی، جس سے خریداری اور تقسیم کے نظام میں شفافیت اور مسابقت کو فروغ ملے گا۔

وزیر پیٹرولیم نے کہا کہ حکومت بی آئی ایس پی کے ڈیٹا کو استعمال کرتے ہوئے مستحق خاندانوں کی نشاندہی کرے گی اور انہیں ایل پی جی پر خصوصی ریلیف فراہم کرنے کے لیے اقدامات کیے جارہے ہیں۔ اس کے علاوہ دسمبر اور جنوری کے دوران ملک میں گیس کی فراہمی برقرار رکھنے کی بھی کوشش کی جارہی ہے تاکہ سردیوں میں عوام کو مشکلات کا سامنا نہ کرنا پڑے۔

دوسری جانب وفاقی وزیر اطلاعات عطا اللہ تارڑ نے کہا ہے کہ وزیراعظم شہباز شریف کی واضح ہدایت ہے کہ حکومتی فیصلوں کے نتیجے میں عوام پر اضافی مالی بوجھ نہ ڈالا جائے۔ ان کے مطابق ایل پی جی سے متعلق حکومتی اقدامات کی وفاقی کابینہ نے منظوری دے دی ہے۔

حکومت کا کہنا ہے کہ ان اقدامات سے ایل پی جی مارکیٹ میں شفافیت بڑھے گی اور مستحق خاندانوں کو مہنگی گیس سے ریلیف فراہم کرنے میں مدد ملے گی۔