شہباز شریف کی قیادت کی تعریف، عالمی تیل کی قیمتوں میں اضافے کے باوجود عوام کو ریلیف فراہم
ویب ڈیسک
مسلم لیگ ن کی سینئر رہنما اور پنجاب کی وزیر، مریم اورنگزیب، نے وزیراعظم شہباز شریف کی قیادت کی تعریف کرتے ہوئے کہا ہے کہ عالمی منڈی میں تیل کی قیمتوں میں مسلسل اضافے کے باوجود وزیراعظم نے عوام پر فوری بوجھ ڈالنے سے گریز کیا۔ انہوں نے کہا کہ یہ فیصلہ صرف پالیسی نہیں بلکہ ذمہ دار قیادت، مؤثر حکمت عملی اور بہترین فِسکل مینجمنٹ کی واضح مثال ہے۔
مریم اورنگزیب نے سماجی رابطے کی ویب سائٹ ایکس پر اپنے بیان میں کہا کہ وزیراعظم نے نہایت دانشمندی سے فِسکل اسپیس پیدا کی، کفایت شعاری کے اقدامات کیے، غیر ضروری اخراجات میں کمی کی اور ہر ممکن طریقے سے عوام کو ریلیف فراہم کیا۔ ان کا کہنا تھا کہ پاکستان کو عالمی سطح پر دیگر ممالک میں دیکھے جانے والے پٹرول بحران سے محفوظ رکھا گیا، جو مضبوط پالیسی اور مؤثر سپلائی چین مینجمنٹ کا ثبوت ہے۔
انہوں نے کہا کہ فرق صرف اس بات میں ہے کہ ذمہ دار قیادت عوام کے مفاد میں کام کرتی ہے، جبکہ کچھ قیادتیں سیاسی فائدے کے لیے ملک کو بحران میں دھکیلتی ہیں۔ مریم اورنگزیب نے کہا کہ ہر پاکستانی کو فخر ہونا چاہیے کہ اس کی قیادت شہباز شریف جیسے سنجیدہ اور ذمہ دار رہنما کے ہاتھ میں ہے، جو مشکل حالات میں بھی عوام کو ریلیف فراہم کر رہا ہے۔
وزیر نے بتایا کہ جب قیمتوں میں اضافہ ناگزیر تھا، تو حکومت نے عوام پر مکمل بوجھ ڈالنے کے بجائے ٹارگیٹڈ سبسڈی کے ذریعے اثر کو متوازن کیا۔ اس پیکج کے تحت دو ویلرز استعمال کرنے والے محنت کش، چھوٹے کسان (25 ایکڑ تک زمین رکھنے والے) اور ٹرانسپورٹ سیکٹر کو خصوصی ریلیف فراہم کیا گیا تاکہ مہنگائی کے اثرات کم کیے جا سکیں۔
مریم اورنگزیب نے وفاقی و صوبائی حکومتوں اور تمام سیاسی جماعتوں کو یکجہتی پر مبارکباد دی اور کہا کہ پاکستان ایک قوم بن کر ان مشکل حالات کا مقابلہ کرے گا۔ انہوں نے یقین دلایا کہ جیسے جیسے عالمی حالات بہتر ہوں گے، اسی عزم اور حکمت کے ساتھ مزید ریلیف بھی فراہم کیا جائے گا۔
انہوں نے کہا کہ یہ قیادت مشکل حالات میں بھی عوام کو تنہا نہیں چھوڑتی بلکہ ہر ممکن حد تک سہارا دیتی ہے۔ اللہ تعالیٰ کا شکر ہے کہ پاکستان ایسے رہنما کے ہاتھوں میں ہے جو عوام کے دکھ درد کو سمجھتا اور ان کے لیے عملی اقدامات کرتا ہے۔
