یونس خان کو پی سی بی میں اہم ذمہ داریاں ملنے کا امکان
لاہور: سابق قومی کپتان یونس خان کو پاکستان کرکٹ بورڈ (پی سی بی) میں اہم عہدہ ملنے کا امکان ہے۔ ذرائع کے مطابق بورڈ نے کرکٹ معاملات میں بہتری کے لیے یونس خان سے رابطہ کیا ہے اور انہوں نے قومی کرکٹ کی ترقی کے لیے اپنی خدمات پیش کر دی ہیں۔
اطلاعات کے مطابق یونس خان کا نام پی سی بی کے نئے ڈائریکٹر ڈومیسٹک کے طور پر بھی زیر غور ہے۔ بورڈ انتظامیہ ڈومیسٹک اسٹرکچر کو مضبوط بنانے اور قومی ٹیم کی کارکردگی میں تسلسل لانے کے لیے ان کے تجربے سے فائدہ اٹھانا چاہتی ہے۔
یونس خان 118 ٹیسٹ میچز میں 10 ہزار سے زائد رنز بنانے والے پاکستان کے مایہ ناز بیٹر رہے ہیں۔ انہوں نے 265 ون ڈے اور 25 ٹی ٹوئنٹی میچز میں بھی ملک کی نمائندگی کی، جبکہ ماضی میں بطور کوچ بھی خدمات انجام دے چکے ہیں۔
ذرائع کا کہنا ہے کہ حتمی منظوری کے بعد ان کی تقرری کا باضابطہ اعلان کیا جائے گا۔
