بال ٹیمپرنگ اسکینڈل: ڈیوڈ وارنر عثمان خواجہ کی حمایت میں سامنے آگئے، تحقیقات پر سوالات اٹھا دیے

سڈنی: آسٹریلیا کے سابق جارح مزاج بلے باز ڈیوڈ وارنر نے 2018 کے کیپ ٹاؤن ٹیسٹ بال ٹیمپرنگ اسکینڈل کے حوالے سے خاموشی توڑتے ہوئے سابق ساتھی کھلاڑی عثمان خواجہ کے انکشافات کی مکمل حمایت کردی ہے۔ ان کا کہنا ہے کہ عثمان خواجہ نے جو کچھ بیان کیا وہ سو فیصد درست ہے اور اب اس معاملے کی حقیقت سب کے سامنے آچکی ہے۔

ڈیوڈ وارنر نے اپنے سوشل میڈیا اکاؤنٹ پر جاری کردہ ویڈیو میں عثمان خواجہ کا شکریہ ادا کرتے ہوئے کہا کہ اس واقعے کو کئی سال گزر چکے ہیں، تاہم اب حقیقت سامنے لانے کی ضرورت تھی۔ انہوں نے کہا کہ عثمان خواجہ نے آگے بڑھ کر وہ باتیں بیان کیں جن کے بارے میں لوگ طویل عرصے سے جاننا چاہتے تھے۔

سابق آسٹریلوی کرکٹر نے کہا کہ عثمان خواجہ نے اس دن پیش آنے والے واقعات کی ایک ایک تفصیل بیان کی، جس پر وہ ان کے شکر گزار ہیں۔ وارنر نے انٹرویو کے عمل پر بھی سوال اٹھاتے ہوئے کہا کہ عثمان خواجہ کیمرون بینکرافٹ کے ساتھ موجود تھے، لیکن ان کا انٹرویو نہیں کیا گیا۔ ان کے بقول یہ بات انہیں حیران کن محسوس ہوئی کہ آخر یہ کیسی تحقیقات تھیں جن میں متعلقہ افراد کا مؤقف مکمل طور پر سامنے نہیں لایا گیا۔

ڈیوڈ وارنر نے واضح کیا کہ ان کا مقصد کسی پر انگلی اٹھانا یا ماضی کے زخم دوبارہ تازہ کرنا نہیں، بلکہ معاملے میں احتساب اور شفافیت کو یقینی بنانا ہے۔ انہوں نے کہا کہ ضروری ہے کہ حقائق کا درست انداز میں جائزہ لیا جائے اور تحقیقات کے ذمہ دار افراد سے بھی جواب طلب کیا جائے۔

ان کا کہنا تھا کہ گزشتہ آٹھ برس کے دوران میڈیا میں اس واقعے سے متعلق متعدد ایسی خبریں سامنے آئیں جو درست نہیں تھیں، جبکہ بہت سے لوگ خاموش رہے۔ وارنر نے مزید کہا کہ وہ گزشتہ چند دنوں سے اپنی بیٹیوں سے بھی اس معاملے پر بات کر رہے تھے تاکہ انہیں بتایا جا سکے کہ حقیقت میں کیا ہوا تھا۔

انہوں نے تسلیم کیا کہ یہ معاملہ ان کے ساتھ ساتھ کیمرون بینکرافٹ اور اسٹیو اسمتھ کے اہل خانہ کے لیے بھی مشکل وقت کا باعث ہے، تاہم ان کے مطابق حقیقت سامنے آنا ضروری تھا۔

واضح رہے کہ 2018 میں جنوبی افریقہ کے خلاف کیپ ٹاؤن ٹیسٹ کے دوران بال ٹیمپرنگ کا واقعہ پیش آیا تھا، جس کے بعد کرکٹ آسٹریلیا نے ڈیوڈ وارنر، اسٹیو اسمتھ اور کیمرون بینکرافٹ کے خلاف تادیبی کارروائی کرتے ہوئے پابندیاں عائد کی تھیں۔