کراچی: فیڈرل انویسٹی گیشن ایجنسی (ایف آئی اے) کے اینٹی کرپشن ونگ نے شہر کے مصروف کاروباری علاقے صدر میں بڑی کارروائی کرتے ہوئے 6 کروڑ روپے سے زائد مالیت کا سونا اور چاندی برآمد کرلی اور ایک ملزم کو گرفتار کرلیا۔ حکام کے مطابق یہ کارروائی خفیہ اطلاع پر کی گئی، جس کے دوران اسمگلنگ اور غیر قانونی کاروبار میں ملوث نیٹ ورک کا سراغ لگایا گیا۔
ایف آئی اے کے ترجمان کے مطابق چھاپے کے دوران ملزم طارق کو موقع سے گرفتار کیا گیا۔ اس کے قبضے سے 40 تولہ سونا، 64 کلو چاندی اور دیگر قیمتی سامان برآمد ہوا۔ ابتدائی تحقیقات سے معلوم ہوا ہے کہ برآمد شدہ سونا اور چاندی اسمگل شدہ ہے، جسے غیر قانونی ذرائع سے ملک میں لایا گیا تھا۔ حکام کا کہنا ہے کہ ملزمان سونے اور چاندی کو مختلف ممالک سے اسمگل کرتے تھے، جن میں افغانستان، ایران اور چین شامل ہیں۔
تحقیقاتی ذرائع کے مطابق ملزمان نہ صرف اسمگل شدہ دھاتیں ملک میں لاتے تھے بلکہ مشینری کی مدد سے سونے اور چاندی کے بسکٹ تیار کرکے انہیں مقامی مارکیٹ میں فروخت بھی کرتے تھے۔ یہ کاروبار مبینہ طور پر کافی عرصے سے جاری تھا، جس کے باعث قومی خزانے کو بھاری نقصان پہنچنے کا خدشہ ہے۔ ایف آئی اے حکام کا کہنا ہے کہ اسمگلنگ کے اس نیٹ ورک کے دیگر ارکان کی نشاندہی کرلی گئی ہے اور ان کی گرفتاری کے لیے چھاپے مارے جا رہے ہیں۔
حکام کے مطابق گرفتار ملزم سے تفتیش جاری ہے اور اس سے حاصل ہونے والی معلومات کی روشنی میں مزید انکشافات متوقع ہیں۔ ایف آئی اے نے ملزم کے خلاف متعلقہ دفعات کے تحت مقدمہ درج کرلیا ہے اور برآمد شدہ سونا و چاندی کو تحویل میں لے کر قانونی کارروائی شروع کردی گئی ہے۔
ایف آئی اے حکام کا کہنا ہے کہ ملک میں اسمگلنگ کے خلاف کارروائیاں جاری رہیں گی اور کسی کو بھی قانون ہاتھ میں لینے کی اجازت نہیں دی جائے گی۔ ادارے نے واضح کیا ہے کہ غیر قانونی کاروبار اور کرپشن میں ملوث عناصر کے خلاف بلاامتیاز کارروائی عمل میں لائی جائے گی تاکہ معیشت کو نقصان پہنچانے والی سرگرمیوں کا سدباب کیا جا سکے۔
