وفاقی آئینی عدالت میں ڈاکٹر عافیہ صدیقی کیس کی سماعت 16 جون کو ہوگی
اسلام آباد:ویب ڈیسک
وفاقی آئینی عدالت نے ڈاکٹر عافیہ صدیقی سے متعلق اہم کیس سماعت کے لیے مقرر کر دیا ہے۔ عدالت 16 جون کو اس مقدمے کی سماعت کرے گی، جبکہ وزیراعظم اور وفاقی کابینہ کے خلاف توہینِ عدالت کی کارروائی سے متعلق اپیل بھی اسی روز زیر سماعت آئے گی۔
عدالتی ذرائع کے مطابق چیف جسٹس کی سربراہی میں دو رکنی بینچ کیس کی سماعت کرے گا۔ سماعت کے دوران ڈاکٹر عافیہ صدیقی کے معاملے کے ساتھ ساتھ اسلام آباد ہائیکورٹ کے اس فیصلے کا بھی جائزہ لیا جائے گا جس میں حکم عدولی کے معاملے پر وزیراعظم اور وفاقی کابینہ کے خلاف توہینِ عدالت کی کارروائی کا حکم دیا گیا تھا۔
یاد رہے کہ وفاقی حکومت نے اسلام آباد ہائیکورٹ کے فیصلے کو چیلنج کرتے ہوئے اپیل دائر کر رکھی ہے۔ حکومت کا مؤقف ہے کہ توہینِ عدالت کی کارروائی کے حوالے سے جاری کیا گیا حکم قانونی اور آئینی نکات کا متقاضی ہے، جس پر اعلیٰ عدالتی فورم سے رہنمائی درکار ہے۔
اس سے قبل وفاقی آئینی عدالت وزیراعظم اور وفاقی کابینہ کے خلاف توہینِ عدالت کی کارروائی کے حکم کو معطل کر چکی ہے۔ اب عدالت آئندہ سماعت میں کیس کے مختلف قانونی پہلوؤں کا جائزہ لے گی اور فریقین کے دلائل سنے گی۔
ڈاکٹر عافیہ صدیقی کا مقدمہ گزشتہ کئی برسوں سے ملکی سطح پر توجہ کا مرکز رہا ہے۔ ان کی وطن واپسی اور قانونی معاونت کے حوالے سے مختلف عدالتی اور حکومتی اقدامات زیر بحث رہے ہیں، جبکہ حالیہ عدالتی پیش رفت کو کیس میں ایک اہم مرحلہ قرار دیا جا رہا ہے۔
قانونی ماہرین کے مطابق 16 جون کی سماعت اس کیس کی آئندہ پیش رفت اور توہینِ عدالت سے متعلق اپیل کے مستقبل کے حوالے سے اہم ثابت ہو سکتی ہے۔
