ہری پور: ایف آئی اے کا بڑا چھاپہ، نجی پلاٹ سے بڑی تعداد میں ٹرانسفارمرز برآمد
ہری پور: فیڈرل انویسٹی گیشن ایجنسی (ایف آئی اے) کمپوزٹ سرکل ایبٹ آباد نے ہری پور میں ایک اہم کارروائی کرتے ہوئے ٹی آئی پی ہاؤسنگ سوسائٹی میں واقع ایک نجی پلاٹ پر کامیاب چھاپہ مارا، جہاں سے بڑی تعداد میں ٹرانسفارمرز برآمد کر لیے گئے۔ کارروائی ایف آئی اے کی جانب سے موصول ہونے والی اطلاعات کی بنیاد پر کی گئی۔
ایف آئی اے ذرائع کے مطابق چھاپے کے دوران برآمد ہونے والے تمام ٹرانسفارمرز کو قانونی کارروائی کے لیے اپنی تحویل میں لے لیا گیا ہے۔ حکام کا کہنا ہے کہ برآمد ہونے والے سامان کی نوعیت، ملکیت اور قانونی حیثیت کا تفصیلی جائزہ لیا جا رہا ہے تاکہ یہ معلوم کیا جا سکے کہ یہ ٹرانسفارمرز کس مقصد کے لیے وہاں رکھے گئے تھے اور آیا ان کا تعلق کسی غیر قانونی سرگرمی سے ہے یا نہیں۔
ذرائع کے مطابق واقعے کے بعد ایف آئی اے نے معاملے کی باقاعدہ انکوائری شروع کر دی ہے۔ مزید تحقیقات کے لیے متعلقہ سرکاری محکموں اور اداروں سے ضروری ریکارڈ بھی طلب کر لیا گیا ہے تاکہ تمام حقائق سامنے لائے جا سکیں۔ تحقیقاتی ٹیم مختلف پہلوؤں کا جائزہ لے رہی ہے اور دستیاب شواہد کی روشنی میں ذمہ دار افراد کا تعین کیا جائے گا۔
ایف آئی اے حکام کا کہنا ہے کہ تحقیقات مکمل طور پر شفاف انداز میں کی جائیں گی اور اگر کسی شخص یا گروہ کے خلاف قانون کی خلاف ورزی ثابت ہوئی تو اس کے خلاف بلاامتیاز قانونی کارروائی عمل میں لائی جائے گی۔ ادارے نے اس عزم کا اعادہ کیا ہے کہ غیر قانونی سرگرمیوں کی روک تھام اور قومی اثاثوں کے تحفظ کے لیے کارروائیاں جاری رہیں گی۔
ایف آئی اے نے عوام سے بھی اپیل کی ہے کہ کسی بھی مشکوک سرگرمی یا غیر قانونی سامان کی اطلاع فوری طور پر متعلقہ اداروں کو دیں تاکہ قانون کی عملداری کو یقینی بنایا جا سکے۔
