سوات میں سوشل میڈیا پر وائرل ویڈیو پر پولیس کا فوری ایکشن، باپ سمیت 5 افراد گرفتار
سوات: سوشل میڈیا پر وائرل ہونے والی ایک ویڈیو کا ڈسٹرکٹ پولیس آفیسر سوات مشتاق احمد نے سخت نوٹس لیتے ہوئے تھانہ مدین پولیس کو فوری کارروائی کی ہدایت کی، جس پر پولیس نے ایک نوجوان پر مبینہ تشدد کے الزام میں اس کے والد، تین بھائیوں اور چچا سمیت 5 افراد کو گرفتار کرلیا۔
تفصیلات کے مطابق گزشتہ روز سوشل میڈیا پر ایک ویڈیو تیزی سے وائرل ہوئی، جس میں چند افراد کو ایک نوجوان کو بند کمرے میں تشدد کا نشانہ بناتے ہوئے دیکھا گیا۔ ویڈیو میں مبینہ طور پر نوجوان کے بال کاٹے جاتے اور اس کے چہرے پر سیاہی لگائی جاتی دکھائی دی۔ ویڈیو سامنے آنے کے بعد واقعے پر سوشل میڈیا صارفین کی جانب سے شدید تشویش کا اظہار کیا گیا۔
واقعے کا نوٹس لیتے ہوئے ڈی پی او سوات مشتاق احمد نے متعلقہ پولیس حکام کو ملزمان کے خلاف فوری کارروائی کی ہدایت کی۔ اس پر ایس ایچ او تھانہ مدین عزیز خان نے پولیس ٹیم کے ہمراہ کارروائی شروع کی اور ویڈیو میں نظر آنے والے افراد کی شناخت اور گرفتاری کے لیے مختلف ذرائع سے تحقیقات کیں۔
پولیس کے مطابق کارروائی کے دوران مبینہ طور پر واقعے میں ملوث 5 افراد کو گرفتار کرلیا گیا۔ گرفتار ملزمان میں متاثرہ نوجوان کے والد عقل محمد، اس کے تین بیٹے احسان، برکت علی اور انور علی جبکہ نوجوان کا چچا تاج محمد شامل ہیں۔
پولیس کا کہنا ہے کہ ابتدائی تحقیقات کے مطابق ملزم والد نے اپنے بیٹوں اور بھائی کے ہمراہ اپنے بیٹے گران باچا کو شادی بیاہ اور دیگر تقریبات میں رقص کرنے پر مبینہ طور پر تشدد کا نشانہ بنایا۔ پولیس کے مطابق ملزمان نے نوجوان کے بال کاٹے اور اس کے چہرے پر سیاہی بھی لگائی۔
واقعے کی ویڈیو سوشل میڈیا پر سامنے آنے کے بعد پولیس نے فوری کارروائی کرتے ہوئے ملزمان کو گرفتار کیا، جس سے قانون نافذ کرنے والے اداروں کی جانب سے شہریوں پر مبینہ تشدد کے واقعات کے خلاف کارروائی کا پیغام بھی سامنے آیا ہے۔
پولیس نے گرفتار ملزمان کے خلاف مقدمہ درج کرکے انہیں پابندِ سلاسل کردیا ہے۔ حکام کے مطابق واقعے کے تمام پہلوؤں کا جائزہ لیا جارہا ہے جبکہ مزید تفتیش جاری ہے۔ پولیس کا کہنا ہے کہ تحقیقات مکمل ہونے کے بعد واقعے سے متعلق مزید حقائق سامنے آنے کی توقع ہے۔
