پشاور میں تھانہ خزانہ پولیس کی کارروائی، 2 مشکوک مسلح ملزمان گرفتار
پشاور میں جرائم پیشہ عناصر کے خلاف پولیس کا کریک ڈاؤن جاری ہے، تھانہ خزانہ پولیس نے کارروائی کرتے ہوئے 2 مشکوک مسلح ملزمان کو گرفتار کرلیا۔
پولیس کے مطابق کارروائی کے دوران گرفتار ملزمان کے قبضے سے غیر قانونی اسلحہ اور متعدد کارتوس برآمد کیے گئے ہیں۔
پولیس حکام کے مطابق گرفتار ملزمان کی شناخت خوشحال خان اور حسین اللہ کے نام سے ہوئی ہے۔ کارروائی کے دوران ملزمان سے ایک رائفل، ایک پستول اور متعدد کارتوس برآمد کیے گئے۔
پولیس کا کہنا ہے کہ ملزمان کے خلاف قانونی کارروائی شروع کردی گئی ہے جبکہ ان سے مختلف زاویوں سے مزید تفتیش بھی جاری ہے۔
حکام کے مطابق تفتیش کے دوران ملزمان سے اسلحے کی موجودگی، ممکنہ جرائم میں استعمال اور دیگر مشتبہ سرگرمیوں سے متعلق معلومات حاصل کی جا رہی ہیں۔
کیپٹل سٹی پولیس پشاور کا کہنا ہے کہ شہر میں جرائم پیشہ اور مشکوک عناصر کے خلاف کارروائیاں جاری رہیں گی اور غیر قانونی اسلحہ رکھنے والوں کے خلاف بلاامتیاز کارروائی کی جائے گی۔
پولیس کی اس کارروائی کو شہر میں امن و امان کی صورتحال بہتر بنانے اور جرائم کی روک تھام کے لیے جاری اقدامات کا حصہ قرار دیا گیا ہے۔
