وزیر دفاع خواجہ آصف کا بھارت کو سخت انتباہ: “پنگا لیا تو پاک فوج ذلت آمیز پھینٹی دے گی”
ویب ڈیسک
وزیر دفاع خواجہ آصف نے بھارت کو سخت انتباہ دیتے ہوئے کہا ہے کہ اگر بھارت نے کوئی جارحانہ اقدام کیا تو پاک فوج پہلے سے بھی زیادہ ذلت آمیز جواب دے گی۔ انہوں نے یہ بیان سماجی رابطوں کے پلیٹ فارم ایکس (سابقہ ٹوئٹر) پر بھارت اور بھارتی وزیر راج ناتھ سنگھ کے حالیہ بیانات کے ردعمل میں دیا۔
خواجہ آصف نے کہا کہ بھارت پاکستان سے پانچ سے چھ گنا بڑا ملک ہے اور اس کے وسائل بھی بے شمار ہیں، تاہم کروڑوں بھارتی شہری آج بھی بھوک اور غربت کا سامنا کر رہے ہیں۔ ان کا کہنا تھا کہ بھارتی وزیر دفاع راج ناتھ سنگھ اپنے حالیہ بیانات کے ذریعے دنیا کو یہ باور کروانے کی کوشش کر رہے ہیں کہ وہ بھی عالمی سطح پر اہم ہیں، لیکن حقیقت یہ ہے کہ پاکستان اس وقت پوری دنیا کی توجہ کا مرکز بن چکا ہے اور بھارت کسی بھی طرح سے پاکستان کے سامنے کھڑا نہیں ہو سکتا۔
انہوں نے بھارت کو خبردار کرتے ہوئے کہا کہ “راج ناتھ جی، بیان دینے سے پہلے اپنی اوقات ضرور دیکھیں۔ اگر کوئی پنگا لیا گیا تو اللہ کے فضل سے پاک فوج پہلے سے زیادہ ذلت آمیز پھینٹی لگائے گی۔” وزیر دفاع نے واضح کیا کہ پاکستان کی افواج ہر ممکنہ خطرے کا بروقت اور مؤثر جواب دینے کے لیے تیار ہیں۔
خواجہ آصف کے مطابق، پاکستان کی فوجی قوت اور دفاعی تیاریوں نے ملک کو ہر طرح کے خطرات سے محفوظ بنایا ہے، اور عالمی برادری بھی پاکستان کی اس مضبوط پوزیشن کی تعریف کر رہی ہے۔ انہوں نے کہا کہ پاکستان نے ہمیشہ جارحیت کا جواب دینے میں صبر اور حکمت عملی اپنائی ہے، لیکن اپنی سرحدوں اور قومی وقار کے تحفظ کے لیے کسی بھی حد تک جانے کے لیے تیار ہے۔
یہ بیان ایسے وقت میں سامنے آیا ہے جب بھارت کی جانب سے مختلف بیانات اور فوجی مظاہروں کے ذریعے پاکستان پر دباؤ ڈالنے کی کوشش کی جا رہی ہے۔ وزیر دفاع کا مؤقف واضح کرتا ہے کہ پاکستان جارحیت کے کسی بھی اقدام کو برداشت نہیں کرے گا اور اپنی سرحدوں کی حفاظت کے لیے ہر ممکن اقدام کرے گا۔
