کوہاٹ روڈ پر ٹریفک حادثہ، ماں بیٹا جاں بحق، 6 افراد زخمی
کوہاٹ روڈ پر جنڈ پھاٹک کے قریب افسوسناک ٹریفک حادثہ پیش آیا، جہاں تیز رفتار ویگن نے سڑک کنارے کھڑی کار کو پیچھے سے ٹکر مار دی۔ حادثے کے نتیجے میں ماں اور بیٹا موقع پر ہی جاں بحق جبکہ 6 افراد زخمی ہوگئے۔
ریسکیو ذرائع کے مطابق حادثہ کوہاٹ روڈ پر جنڈ پھاٹک کے قریب پیش آیا۔ ابتدائی اطلاعات کے مطابق ویگن بے قابو ہوکر سڑک کنارے کھڑی کار سے جا ٹکرائی، جس کے باعث کار میں موجود افراد شدید متاثر ہوئے۔
حادثے کی اطلاع ملتے ہی ریسکیو 1122 کی امدادی ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کردیں۔ ریسکیو اہلکاروں نے حادثے میں جاں بحق ہونے والے ماں اور بیٹے کی لاشیں جبکہ زخمیوں کو بھی اپنی تحویل میں لے لیا۔
ریسکیو ذرائع کے مطابق جاں بحق افراد کی لاشوں اور 6 زخمیوں کو ہسپتال جنڈ منتقل کردیا گیا، جہاں زخمیوں کو طبی امداد فراہم کی جا رہی ہے۔
ریسکیو حکام کا کہنا ہے کہ حادثے کی مزید وجوہات جاننے کے لیے کارروائی جاری ہے۔ حادثے کے نتیجے میں دونوں گاڑیوں کو بھی نقصان پہنچا، جبکہ واقعے کے بعد کوہاٹ روڈ پر کچھ دیر کے لیے ٹریفک کی روانی متاثر ہوئی۔
حکام کی جانب سے حادثے کی مکمل وجوہات اور ذمہ دار فریق کا تعین مزید تحقیقات کے بعد کیا جائے گا۔
