خیبر پختونخوا کابینہ کا اجلاس طلب، 12 نکاتی ایجنڈا جاری
پشاور: خیبر پختونخوا کابینہ کا اجلاس آج طلب کرلیا گیا ہے، جس کے لیے 12 نکاتی ایجنڈا جاری کردیا گیا۔ اجلاس میں صوبے کے مختلف محکموں سے متعلق اہم انتظامی، مالی اور ترقیاتی امور پر غور کیا جائے گا۔
کابینہ اجلاس کے ایجنڈے میں خیبر پختونخوا میں محکمہ انسداد دہشت گردی کے قیام کے لیے ترقیاتی اسکیم کے تحت فنڈز کی منظوری کا معاملہ شامل ہے۔ اس کے علاوہ پشاور میں ریجنل سی ٹی ڈی ہیڈکوارٹرز کی تعمیر کے لیے فنڈز جاری کرنے کی تجویز بھی کابینہ کے سامنے پیش کی جائے گی۔
اجلاس میں صوبے میں انسداد دہشت گردی کے نظام کو مزید منظم اور مؤثر بنانے کے لیے مختلف اقدامات پر غور متوقع ہے۔ سی ٹی ڈی کے نئے ڈھانچے اور ریجنل ہیڈکوارٹرز کی تعمیر کو سکیورٹی کے حوالے سے اہم قرار دیا جا رہا ہے۔
کابینہ کے اجلاس میں مالی سال 2026-27 کے تعلیمی سیشن کے لیے ملک بھر کے مختلف طبی اداروں میں میڈیکل اور ڈینٹل کالجز کی مخصوص نشستوں کی تقسیم سے متعلق پالیسی بھی زیر غور آئے گی۔
صحت کے شعبے میں مالی معاونت سمیت دیگر سرکاری محکموں سے متعلق معاملات بھی ایجنڈے کا حصہ ہیں۔ کابینہ اجلاس میں پیش کیے جانے والے 12 نکاتی ایجنڈے پر غور کے بعد مختلف امور کی منظوری دیے جانے کا امکان ہے۔
حکام کے مطابق اجلاس میں صوبے کی انتظامی اور ترقیاتی ترجیحات سے متعلق دیگر اہم فیصلے بھی متوقع ہیں۔
