سونے کی قیمت میں کمی جاری، فی تولہ قیمت 4 لاکھ 65 ہزار 336 روپے ہوگئی
پاکستان میں فی تولہ سونا مزید 800 روپے سستا، عالمی مارکیٹ میں بھی قیمت کم ہوگئی
اسلام آباد: پاکستان میں سونے کی قیمتوں میں کمی کا سلسلہ جاری ہے اور آج بھی فی تولہ سونا 800 روپے سستا ہوگیا۔
آل پاکستان صرافہ جیمز اینڈ جیولرز ایسوسی ایشن کے مطابق 800 روپے کمی کے بعد ملک میں فی تولہ سونے کی قیمت 4 لاکھ 65 ہزار 336 روپے ہوگئی ہے۔
اسی طرح 10 گرام سونے کی قیمت میں بھی 686 روپے کی کمی ریکارڈ کی گئی، جس کے بعد 10 گرام سونا 3 لاکھ 98 ہزار 950 روپے کا ہوگیا۔ اس سے ایک روز قبل بھی فی تولہ سونے کی قیمت میں 1800 روپے کی نمایاں کمی ہوئی تھی۔
سونے کے ساتھ ملک میں چاندی کی قیمت میں بھی کمی دیکھی گئی۔ ایسوسی ایشن کے مطابق چاندی کی فی تولہ قیمت 50 روپے کمی کے بعد 7 ہزار 129 روپے ہوگئی، جبکہ 10 گرام چاندی کی قیمت 43 روپے کم ہو کر 6 ہزار 111 روپے ریکارڈ کی گئی۔
دوسری جانب عالمی مارکیٹ میں بھی سونے کی قیمت میں کمی ہوئی ہے۔ بین الاقوامی مارکیٹ میں فی اونس سونے کی قیمت 8 ڈالر کم ہو کر 4 ہزار 428 ڈالر ہوگئی۔
عالمی سطح پر چاندی کی قیمت میں بھی کمی ریکارڈ کی گئی اور فی اونس چاندی 50 سینٹ کمی کے بعد 66.50 ڈالر پر آگئی۔
ماہرین کے مطابق عالمی مارکیٹ میں سونے کی قیمت میں مزید کمی ہوئی تو اس کے اثرات پاکستان کی مقامی صرافہ مارکیٹ پر بھی پڑ سکتے ہیں، جس کے نتیجے میں آنے والے دنوں میں سونے کی قیمت مزید کم ہونے کا امکان ہے۔
سونے کی قیمتوں میں حالیہ کمی سے زیورات خریدنے والے صارفین کو کچھ ریلیف مل سکتا ہے، تاہم عالمی مارکیٹ کے اتار چڑھاؤ اور ملکی معاشی صورتحال کے باعث قیمتوں میں مزید تبدیلی کا امکان برقرار ہے۔
