لاہور: قربانی کا گوشت اکٹھا کرنے کی آڑ میں ایک کروڑ روپے سے زائد کی چوری، باپ بیٹا گرفتار
لاہور: عیدالاضحیٰ کے موقع پر قربانی کا گوشت اکٹھا کرنے کی آڑ میں گھروں کی ریکی کرکے ایک کروڑ روپے سے زائد مالیت کی چوری کی واردات کرنے والے باپ بیٹے کو پولیس نے گرفتار کر لیا۔ ملزمان نے لاہور کے پوش علاقے ڈیفنس میں واردات کو انتہائی منصوبہ بندی کے ساتھ انجام دیا اور بعد ازاں خود کو مشکوک ہونے سے بچانے کے لیے معمول کے مطابق مختلف گھروں سے قربانی کا گوشت بھی جمع کرتے رہے۔
پولیس کے مطابق عیدالاضحیٰ کے روز ڈیفنس کے ایک گھر میں ایک کروڑ روپے سے زائد مالیت کے زیورات، گھڑیاں، غیر ملکی کرنسی اور دیگر قیمتی سامان چوری ہونے کی اطلاع ملی تھی۔ واردات کے بعد پولیس نے تفتیش کا آغاز کیا اور مختلف شواہد، گواہوں کے بیانات اور کلوز سرکٹ کیمروں کی فوٹیجز کا جائزہ لیا۔
ڈی آئی جی آپریشنز فیصل کامران کے مطابق ملزمان کی شناخت جوزف اور جمشید کے نام سے ہوئی، جو باپ اور بیٹا ہیں۔ دونوں کو ٹبہ گوہاوہ کے علاقے سے گرفتار کیا گیا۔ ابتدائی تحقیقات میں انکشاف ہوا کہ ملزمان عید کے روز سائیکلوں پر سوار ہو کر مختلف رہائشی علاقوں میں گھومتے رہے اور قربانی کا گوشت مانگنے کے بہانے گھروں کی صورتحال کا جائزہ لیتے رہے۔
پولیس کا کہنا ہے کہ ملزمان نے واردات سے قبل متاثرہ گھر کی تین مرتبہ گھنٹی بجائی تاکہ اہل خانہ کی موجودگی یا غیر موجودگی کی تصدیق کی جا سکے۔ گھر خالی ہونے کا یقین ہونے پر ایک ملزم دیوار اور گیٹ پھلانگ کر اندر داخل ہوا جبکہ دوسرا باہر نگرانی کرتا رہا۔ ملزم تقریباً ایک گھنٹے تک گھر کے اندر موجود رہا اور قیمتی سامان سمیٹ کر فرار ہوگیا۔
تحقیقات کے مطابق واردات کے بعد بھی دونوں ملزمان مختلف علاقوں میں قربانی کا گوشت جمع کرتے رہے تاکہ ان کی سرگرمیاں معمول کا حصہ محسوس ہوں اور کسی کو ان پر شک نہ ہو۔ تاہم پولیس نے سی سی ٹی وی فوٹیجز اور دیگر شواہد کی مدد سے ملزمان کا سراغ لگا لیا۔
ڈی آئی جی آپریشنز نے بتایا کہ گرفتاری کے دوران ملزمان کے قبضے سے چوری شدہ زیورات، مہنگی گھڑیاں، غیر ملکی کرنسی اور دیگر قیمتی سامان بھی برآمد کر لیا گیا ہے۔ پولیس مزید تحقیقات کر رہی ہے تاکہ معلوم کیا جا سکے کہ آیا ملزمان اس نوعیت کی دیگر وارداتوں میں بھی ملوث رہے ہیں یا نہیں۔
پولیس حکام نے شہریوں کو ہدایت کی ہے کہ عید اور دیگر تہواروں کے دوران گھروں کی حفاظت کے لیے خصوصی احتیاطی تدابیر اختیار کریں اور مشکوک افراد کی فوری اطلاع قانون نافذ کرنے والے اداروں کو دیں۔
