مجھے پی سی بی نے صبح 3 بجے پیغام دیا کہ آپ انگلینڈ ٹیسٹ میچ کے لیے جا رہے ہیں، ایشلے نوفکے
پاکستان کرکٹ ٹیم کے فاسٹ بولنگ کوچ ایشلے نوفکے نے کہا ہے کہ انہیں انگلینڈ کے خلاف ٹیسٹ سیریز کے لیے روانگی سے متعلق پاکستان کرکٹ بورڈ (پی سی بی) کی جانب سے رات گئے اطلاع دی گئی تھی۔ برمنگھم کے ایجبسٹن کرکٹ گراؤنڈ میں انگلینڈ کے خلاف تیسرے ٹیسٹ سے قبل پریس کانفرنس کرتے ہوئے ایشلے نوفکے نے ٹیم سے متعلق مختلف امور پر گفتگو کی۔
49 سالہ فاسٹ بولنگ کوچ نے بتایا کہ انہیں پی سی بی کی جانب سے صبح 3 بج کر 15 منٹ پر پیغام موصول ہوا کہ انہیں انگلینڈ ٹیسٹ میچ کے لیے جانا ہے۔ ایشلے نوفکے آسٹریلیا کی جانب سے ایک ون ڈے اور دو ٹی ٹوئنٹی انٹرنیشنل میچز بھی کھیل چکے ہیں اور اب پاکستان ٹیم کے کوچنگ اسٹاف کا حصہ ہیں۔
پاکستان اور انگلینڈ کے درمیان جاری ٹیسٹ سیریز کے دوران اسکواڈ میں ہونے والی تبدیلیوں کے حوالے سے سوال پر ایشلے نوفکے نے تسلیم کیا کہ سیریز کے دوران کھلاڑیوں کا تبدیل ہونا کسی بھی لحاظ سے حوصلہ افزا صورتحال نہیں، تاہم ان کا کہنا تھا کہ ٹیم کی توجہ صرف کرکٹ اور میدان میں کارکردگی پر مرکوز ہے۔
ایجبسٹن کی پچ کے حوالے سے فاسٹ بولنگ کوچ کا کہنا تھا کہ وکٹ پر اس وقت گھاس موجود ہے، تاہم ابھی یہ کہنا قبل از وقت ہوگا کہ ٹیسٹ میچ کے دوران بھی پچ پر اتنی ہی گھاس برقرار رکھی جائے گی یا اس میں کوئی تبدیلی کی جائے گی۔
پاکستان ٹیم کے کمبی نیشن سے متعلق سوال پر ایشلے نوفکے نے کہا کہ اس بارے میں بات کرنا قدرے قبل از وقت ہے۔ ان کے مطابق حتمی کمبی نیشن اور پلیئنگ الیون سے متعلق فیصلہ ٹاس سے قبل ہی واضح ہوگا، اس لیے اس مرحلے پر کسی حتمی نتیجے پر پہنچنا مناسب نہیں۔
پریس کانفرنس کے دوران پاکستان بھیجے گئے بعض کھلاڑیوں سے متعلق مبینہ تحقیقات کے حوالے سے بھی سوال کیا گیا۔ صحافی نے پوچھا کہ کیا ان کھلاڑیوں سے کرکٹ سے ہٹ کر کسی دوسرے معاملے پر تحقیقات کی جارہی ہیں؟
اس سوال پر ایشلے نوفکے نے واضح کیا کہ انہیں اس معاملے کے بارے میں کوئی خاص معلومات نہیں۔ انہوں نے کہا کہ اس حوالے سے انہیں صحافی سے ہی معلوم ہوا ہے اور وہ اس بارے میں کچھ نہیں جانتے۔ تاہم سوال کے انداز پر انہوں نے امید ظاہر کی کہ ایسا کچھ نہ ہو۔
پاکستانی ٹیم کی جانب سے تیسرے ٹیسٹ کی تیاریوں کے دوران کوچنگ اسٹاف کی توجہ کھلاڑیوں کی کارکردگی، پچ کے حالات اور انگلینڈ کے خلاف بہتر حکمت عملی ترتیب دینے پر مرکوز ہے۔ ایجبسٹن ٹیسٹ دونوں ٹیموں کے لیے اہمیت کا حامل ہے اور پاکستان ٹیم بہتر نتائج کے لیے میدان میں اترے گی۔
