ملک میں حالیہ مون سون بارشوں سے 126 افراد جاں بحق، 416 زخمی: این ڈی ایم اے
اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں جاری مون سون بارشوں سے ہونے والے جانی و مالی نقصانات کی تازہ رپورٹ جاری کر دی ہے، جس کے مطابق 26 جون سے 2 اگست 2026 تک مختلف حادثات میں 126 افراد جاں بحق جبکہ 416 افراد زخمی ہوئے ہیں۔ رپورٹ کے مطابق شدید بارشوں، سیلابی ریلوں، مکانوں کی چھتیں گرنے، لینڈ سلائیڈنگ اور کرنٹ لگنے جیسے واقعات کے باعث ملک کے مختلف علاقوں میں بڑے پیمانے پر نقصان ریکارڈ کیا گیا۔
این ڈی ایم اے کے مطابق حالیہ بارشوں سے سب سے زیادہ جانی نقصان خیبرپختونخوا میں ہوا، جہاں 55 افراد جاں بحق ہوئے، جن میں 26 بچے بھی شامل ہیں۔ متعدد علاقوں میں شدید بارشوں اور سیلابی صورتحال کے باعث لوگوں کو محفوظ مقامات پر منتقل کیا گیا، جبکہ ریسکیو ادارے متاثرہ علاقوں میں امدادی کارروائیوں میں مصروف ہیں۔
رپورٹ کے مطابق پنجاب میں بارشوں سے متعلق مختلف حادثات میں 47 افراد جان کی بازی ہار گئے، جن میں 19 بچے شامل ہیں، جبکہ 295 افراد زخمی ہوئے، جن میں 68 بچے بھی شامل ہیں۔ بیشتر حادثات چھتیں گرنے، بجلی کے کرنٹ، دیواریں منہدم ہونے اور نشیبی علاقوں میں پانی جمع ہونے کے باعث پیش آئے۔
سندھ میں مون سون بارشوں کے دوران 5 افراد جاں بحق جبکہ 7 افراد زخمی ہوئے۔ جاں بحق ہونے والوں میں 2 بچے بھی شامل ہیں۔ دوسری جانب بلوچستان میں بارشوں اور متعلقہ حادثات کے نتیجے میں 8 افراد جاں بحق اور 15 افراد زخمی ہوئے۔ کئی علاقوں میں رابطہ سڑکیں متاثر ہوئیں جبکہ مقامی انتظامیہ بحالی کے کاموں میں مصروف ہے۔
این ڈی ایم اے نے متعلقہ صوبائی حکومتوں، ضلعی انتظامیہ اور ریسکیو اداروں کو ہدایت کی ہے کہ متاثرہ علاقوں میں امدادی سرگرمیاں تیز کی جائیں اور شہریوں کو ممکنہ خطرات سے بروقت آگاہ رکھا جائے۔ ادارے نے عوام سے بھی اپیل کی ہے کہ موسمی حالات کے پیش نظر غیر ضروری سفر سے گریز کریں، نشیبی علاقوں، برساتی نالوں اور سیلابی راستوں سے دور رہیں، جبکہ بچوں کو بارش کے دوران بجلی کے کھمبوں اور کھلے تاروں سے محفوظ رکھا جائے۔
این ڈی ایم اے کے مطابق مون سون کا سلسلہ آئندہ دنوں میں بھی جاری رہنے کا امکان ہے، اس لیے تمام متعلقہ اداروں کو ہائی الرٹ رہنے اور ہنگامی صورتحال سے نمٹنے کے لیے ضروری اقدامات جاری رکھنے کی ہدایت کی گئی ہے تاکہ مزید جانی و مالی نقصان سے بچا جا سکے۔
