نادرا نے شہریوں کے لیے اے ٹی ایم طرز کی سیلف سروس مشین متعارف کرا دی
نادرا نے شہریوں کو شناختی دستاویزات سے متعلق بنیادی خدمات فراہم کرنے کے لیے سیلف سروس کیاسک متعارف کرا دیا ہے، جس کے ذریعے شہریوں کو معمولی نوعیت کے کاموں کے لیے نادرا مراکز میں لمبی قطاروں میں انتظار نہیں کرنا پڑے گا۔
اے ٹی ایم کی طرز پر دکھائی دینے والی یہ مشین شناختی کارڈ سے متعلق مختلف خدمات فراہم کرے گی۔ شہری شناختی کارڈ بنوانے، تجدید کرانے اور فیملی رجسٹریشن سرٹیفکیٹ (FRC) سمیت بعض بنیادی سہولیات خودکار طریقے سے حاصل کرسکیں گے۔
مشین کا استعمال بھی نسبتاً آسان رکھا گیا ہے۔ شہری پہلے مشین کے سامنے اپنی شناخت کی تصدیق کریں گے، اس کے بعد اسکرین پر مطلوبہ سروس کا انتخاب کریں گے۔ مشین خود ہی صارف کو اگلے مراحل سے متعلق رہنمائی فراہم کرے گی، جس کے باعث کاؤنٹر پر عملے سے رجوع کرنے کی ضرورت کم ہوجائے گی۔
نادرا کے ترجمان سید شباحت علی کے مطابق تقریباً 65 سے 70 فیصد شہری ان خودکار مشینوں کے ذریعے بغیر رش کے اپنی ضروری خدمات حاصل کرسکتے ہیں۔
نادرا کا کہنا ہے کہ سیلف سروس کیاسک متعارف کرانے کا مقصد شہریوں کے لیے خدمات کے حصول کا عمل تیز، آسان اور زیادہ سہل بنانا ہے۔ اس نظام سے نادرا مراکز پر رش کم کرنے کے ساتھ ساتھ عملے پر کام کا دباؤ بھی کم ہونے کی توقع ہے۔
یہ سہولت خاص طور پر ان شہریوں کے لیے مفید ثابت ہوسکتی ہے جو معمولی نوعیت کی خدمات کے لیے کئی گھنٹے نادرا مراکز میں انتظار کرتے ہیں۔ خودکار نظام کے ذریعے شہری اپنی شناخت کی تصدیق کے بعد مطلوبہ سروس منتخب کرکے مشین کی ہدایات پر عمل کرسکیں گے۔
ڈیجیٹل سہولیات کے فروغ کے ساتھ نادرا کی جانب سے خودکار سروسز کا دائرہ بڑھایا جا رہا ہے، جس کا مقصد شہریوں کو روایتی کاؤنٹر سسٹم کے بجائے زیادہ تیز اور جدید طریقے سے خدمات فراہم کرنا ہے۔
