ٹیکس گزار اور افسر کے درمیان براہِ راست رابطہ ختم کیا جا رہا ہے، فیس لیس سسٹم متعارف ہوگا: وزیر خزانہ
اسلام آباد: وزیر خزانہ محمد اورنگزیب نے قومی اسمبلی کے بجٹ اجلاس سے خطاب کرتے ہوئے کہا ہے کہ حکومت ٹیکس نظام میں بنیادی اصلاحات متعارف کرا رہی ہے، جن کے تحت ٹیکس گزار اور ٹیکس افسر کے درمیان براہِ راست رابطہ ختم کر دیا جائے گا اور اس کی جگہ جدید فیس لیس سسٹم نافذ کیا جائے گا۔
انہوں نے کہا کہ نئے نظام کا مقصد شفافیت کو فروغ دینا، انسانی مداخلت کم کرنا اور ٹیکس دہندگان کو آسان اور مؤثر سہولیات فراہم کرنا ہے۔ ان کا کہنا تھا کہ ایف بی آر کی کارکردگی کے حوالے سے تنقید کی گئی ہے اور حکومت مثبت تنقید کو خوش آمدید کہتی ہے کیونکہ یہی اصلاحات اور بہتری کا ذریعہ بنتی ہے۔
وزیر خزانہ نے خطاب میں خطے کی حالیہ صورتحال کا ذکر کرتے ہوئے کہا کہ پاکستان کی سفارتی کوششیں کامیاب رہیں اور خطے میں جنگ کے بادل چھٹ گئے۔ انہوں نے اس پیش رفت پر فیلڈ مارشل عاصم منیر، وزیراعظم شہباز شریف اور پاکستانی عوام کو مبارکباد پیش کی اور کہا کہ پاکستان نے کشیدگی کم کرانے میں اہم کردار ادا کیا۔
محمد اورنگزیب نے کہا کہ گزشتہ بجٹ کے دوران وزیراعظم شہباز شریف نے معیشت کی سمت واضح کر دی تھی، جس کے نتیجے میں معاشی استحکام حاصل ہوا۔ ان کے مطابق ملکی صنعتیں فعال ہیں، کرنٹ اکاؤنٹ خسارہ سرپلس میں تبدیل ہو چکا ہے جبکہ برآمدی شعبے میں بھی نمایاں بہتری دیکھنے میں آ رہی ہے۔
انہوں نے مزید بتایا کہ آئی ٹی برآمدات میں 20 فیصد اضافہ ریکارڈ کیا گیا ہے، جو ڈیجیٹل معیشت اور ٹیکنالوجی کے شعبے میں حکومتی پالیسیوں کی کامیابی کا ثبوت ہے۔
وزیر خزانہ کا کہنا تھا کہ حکومت معیشت کی مضبوطی، ٹیکس نظام کی ڈیجیٹلائزیشن اور سرمایہ کاری کے فروغ کے لیے اصلاحاتی ایجنڈے پر عمل پیرا ہے تاکہ ملک کو پائیدار اقتصادی ترقی کی راہ پر گامزن کیا جا سکے۔
